„დემოკრატიული მოძრაობა-ერთიანი საქართველოს“ ლიდერის, ნინო ბურჯანაძის განცხადებით, ზაზა სარალიძისა და მალხაზ მაჩალიკაშვილის მხარდამჭერ აქციებზე პოლიტიკურ პარტიებს გაცილებით მეტი აქტიურობა უნდა გამოეჩინათ, თუმცა, მისივე თქმით, იმის გამო, რომ პარტიებს არ დაბრალებოდათ პროცესის პოლიტიკური მიზნებისთვის გამოყენება, პარტიების აბსოლუტურმა უმრავლესობამ პროცესისგან დისტანცირება მოახდინა და რის გამოც აღნიშნული პროცესი „ნაციონალური მოძრაობის“ ხელში გადავიდა.

ნინო ბურჯანაძე მიიჩნევს, რომ „როცა ადამიანს სისტემა დაუპირისპირდა და მოხდა სისტემური დანაშაული, როცა მთავარი პროკურორი გადადგა, როცა ვითხოვთ იუსტიციის მინისტრის გადაყენებას და შესაბამისი სტრუქტურების პასუხისმგებლობის საკითხის დაყენებას, ბუნებრივია, ეს პოლიტიკური პროცესებისა და შეფასებების გარეშე ვერ მოხდება".

„აქციის ორგანიზატორები მოქმედებისას, გარკვეულწილად, არათანმიმდევრული იყვნენ, მათ შორის იმიტომ, რომ ისინი და აქციის მონაწილეები რაღაცნაირად ცდილობდნენ, პოლიტიკური პროცესისგან, თავად არსისგან მაქსიმალურად ყოფილიყო დისტანცირება. ერთია პოლიტიკური გემოვნება, ვინმეს მიმღებლობა, თუ მიუღებლობა, მაგრამ ყველა პოლიტიკურ პარტიას გაცილებით მეტი აქტიურობა უნდა გამოგვეჩინა. როგორც ჩანს, გარკვეულწილად, ამან ჩვენზეც იმოქმედა და გარკვეული კომპლექსიც იყო, რომ არ დაგვბრალებოდა, თითქოს, ამას პოლიტიკური მიზნებისთვის ვიყენებდით. პარტიების აბსოლუტურმა უმრავლესობამ პროცესისგან დისტანცირება მოახდინა და ამანაც განაპირობა ის, რომ პროცესი პრაქტიკულად, „ნაციონალური მოძრაობის“ ხელში გადავიდა“, განაცხადა ბურჯანაძემ.

შეკითხვაზე, შეუერთდება თუ არა მისი პარტია აქციებს იმ შემთხვევაში, თუ აქციები გაგრძელდება, ნინო ბურჯანაძემ აღნიშნა, რომ ის არაფერს არ უერთდება და არც აკლდება.

„პოლიტიკური, ან არსებული ვითარებიდან გამომდინარე, მე ვიღებ კონკრეტულ გადაწყვეტილებას, როდის რა მოქმედებაა საჭირო. თანაგუნდელებთან ერთად, სარალიძეს, მაჩალიკაშვილსა და ყველა უდანაშაულოდ დაჩაგრულ ადამიანს დღესაც გვერდით ვუდგავარ და რა მიმართულებით ვიმოქმედებთ, ეს სამომავლოდ გამოჩნდება“, განაცხადა ბურჯანაძემ, როგორც ამას საზოგადოებრივი მაუწყებელი იტყობინება.