„ქართული ოცნების" ცენტრალურ ოფისში უმრავლესობასა და მინისტრთა კაბინეტის წევრებს შორის რამდენიმესაათიანი შეხვედრის შემდეგ, რომელსაც პარტიის თავმჯდომარე ბიძინა ივანიშვილიც ესწრებოდა, არჩილ თალაკვაძემ განაცხადა, რომ უმრავლესობის სხდომაზე სამთავრობო ცვლილებები განხილული არ ყოფილა.

თალაკვაძემ აღნიშნული განცხადება რამდენიმე წუთის წინ ჟურალისტებთან საუბრისას გააკეთა.

შეხვედრის დაწყებამდე დეპუტატები სამთავრობო ცვლილებებზე საუბრობდნენ და აცხადებდნენ, რომ ცვლილებები ბოლოდროინდელი პროცესებიდან გამომდინარე საჭირო და აუცილებელია. არჩილ თალაკვაძემ კი აღნიშნა, რომ „ზოგიერთ დეპუტატს შესაძლოა აქვს მსგავსი მოსაზრება", თუმცა, რეალურად უმრავლესობის სხდომაზე განხილული არა მთავრობაში დაგეგმილი ცვლილებები, არამედ მიმდინარე პროცესები და გაეროს ეგიდით ჩატარებული კვლევის შედეგები იყო.

„ვიმსჯელეთ გაეროს ეგიდით ჩატარებული კვლევის ძირითად შედეგებზე და ამ შედეგებთან დაკავშირებით იყო განხილული მთელი რიგი საკითხები, მათ შორის, კვლევით უკვე ცნობილია, რომ ჩვენი თანამოქალაქეების მნიშვნელოვანი ნაწილი კვლავ დგას იმ პრობლემების წინაშე, რაშიც ხელისუფლების და მთავრობის მოქმედების გეგმა საჭიროა. ჩვენ ველოდებით მთავრობისგან კონკრეტულ სამოქმედო გეგმას იმ შედეგებთან დაკავშირებით, რომელიც მოსახლეობის კეთილდღეობასთან დაკავშირებით გადაიდგმება", განაცხადა თალაკვაძემ.

შეკითხვაზე, თუკი აღნიშნულ შეხვედრაზე, რომელიც სამი საათის განმავლობაში მიმდინარეობდა, მართლაც გაეროს ეგიდით ჩატარებული კვლევაზე იყო მსჯელობა და არა სამთავრობო ცვლილბებზე, დაესახელებინა კონკრეტული მონაცემები თუ რამდენი ბავშვი რჩება სიღარიბეში, თალაკვაძემ აღნიშნა:

„ვერ დავინახე მე ლოგიკური კავშირი, რომლის აგებასაც თქვენ ცდილობთ. როგორც უმრავლესობის წარმომადგენელი გეუბნებით, რომ ამ კვლევაში იმ დადებით შედეგებთან ერთად, რომლებიც ჩვენს ეკონომიკურ რეფორმებს მოჰყვა, არის საუბარი მნიშვნელოვან საკითხებზე, რომლებიც აწუხებს ჩვენს საზოგადოებას. შესაბამისად, ხალხის მიერ არჩეული პარლამენტის და პარლამენტარების რეაქცია და მოლოდინი არის ის, რომ ჩვენ მივიღოთ ქმედითი პასუხი ამ პრობლემებთან დაკავშირებით. კონკრეტულად გპასუხობთ, ეს ეხება ხანდაზმულ ადამიანებს, ეს ეხებათ პენსიონერებს, ეს ეხებათ ბავშვებს და მოწყვლად ჯგუფებს ჩვენი საზოგადოების", განაცხადა თალაკვაძემ, რომელმაც თქვა, რომ საუბარი შეეხო ხორავას ქუჩაზე მომხდარ მკვლელობასაც და მთავრობამ მიიღო პრინციპული გადაწყვეტილება - აღსრულდეს მართლმსაჯულება და არ დარჩეს საზოგადოებას ამ საქმეზე შეკითხვები.

შეკითხვაზე, არის თუ არა მოსალოდნელი სამთავრობო ცვლილებები უახლოეს პერიოდში, თალაკვაძემ ასე უპასუხა:

„ჩვენთვის პრიორიტეტი არის იმ პირობების და იმ ამოცანების შესრულება, რომლებიც საზოგადოებამ დაგვისახა ჩვენ, ამ პროცესში, რა თქმა უნდა, გადაწყვეტილებები, რომლებიც იქნება საკანონმდებლო თუ იქნა საკადრო, თუ იქნება პოლიტიკური გადაწყვეტილებები, ჩვენთვის არის მეორეხარისხოვანი. თუ ეს საჭირო გახდება, რაღა თქმა უნდა, ჩვენ გუნდში არასოდეს არ ყოფილა გადაწყვეტილებებზე მსჯელობის პრობლემა, თუმცა დღეს ამასთან დაკავშირებით მსჯელობა არ ყოფილა.... ამ შეხვედრის მნიშვნელოვანი ნაწილი იყო კვლევის განხილვა. მიღწეულთან ერთად, ჩვენ ვხედავთ, რომ რჩება საკმაოდ საყურადღებო პრობლემები - სოციალური სახის პრობლემები, რაზეც როგორც გითხარით, ჩვენ ველოდებით მთავრობის მხრიდან სამოქმედო გეგმას. ამ შედეგებთან დაკავშირებით, ჩვენთვის უმთავრესი არის, რომ მიიღონ ქმედითი ზომები და გონივრულ დროში, ეს საკითხები შეძლებისდაგვარად აღმოიფხვრას".