საქართველოს პრემიერ მინისტრის პოსტიდან გიორგი კვირიკაშვილის წასვლას აფასებს „ერთიანი ნაციონალური მოძრაობის“ პოლიტიკური საბჭოს თავმჯდომარე ნიკა მელია და აცხადებს, რომ „ეს არის უკანასკნელი მთავრობა, რომელსაც ბიძინა ივანიშვილი წარადგენს“ და „ყველაფერი დამთავრდება შემოდგომაზე“.

„ბევრი ვერაფერი ვერ გავიგე მისი საუბრიდან. პირდაპირ გეტყვით: ბევრად უფრო ღირსეულად წავიდა ბატონი ღარიბაშვილი. ბატონმა ღარიბაშვილმა ის მაინც თქვა, რომ, ბიძინამ დამნიშნა და ბიძინამ გამიშვა. ბატონმა კვირიკაშვილმა თქვა შემდეგი, რომ თითქოს მას აქვს უთანხმოება თვეების განმავლობაში ხედვებთან დაკავშირებით პარტიის თავმჯდომარესთან, თვეების განმავლობაშიო, არადა სამი კვირის წინ აირჩია ქართული ოცნების პოლიტსაბჭომ მხოლოდ პარტიის თავმჯდომარედ. ასევე, ეს ადამიანი, 30 მარტს საუბრობდა ცინიკურად, საზოგადოებას და ოპოზიციას ესაუბრებოდა, რომ აქ ყვავ-ყორნებივით რომ დასტრიალებთო ჩემს ადმინისტრაციას და რომ ელოდებითო, ტაიმერი როდის დარეკავს და როდის გადავდგებიო, პირობას გაძლევთო, რომ ტაიმერი რამდენიმე წელს არ დარეკავსო. აქიდან გამომდინარე, რისი თქმა შეიძლება და თამამად თან, დიახაც საზოგადოებისთვის ეს არის პირველი, მაგრამ ძალიან პატარა გამარჯვება. ეს არის უკანასკნელი მთავრობა, რომელსაც ბიძინა ივანიშვილი წარადგენს, უკანასკნელი მთავრობა - ყველაფერი დამთავრდება შემოდგომაზე. ბიძინა ივანიშვილმა დაიწყო ბარტყების გადმოგდება საკუთარი თავის გადასარჩენად. გადმოაგდო მირზა სუებლიანი, გადმოაგდო შოთაძე, და გადმოფერთხა მთელი მთავრობა. მე იმედი მაქვს ვერ გაბედავს ახლა ქალბატონი წულუკიანის, ბატონი გახარიასი და სხვა კორუმპირებული ადამიანების დატოვებას ამ მთავრობის შემადგენლობაში... ქვეყანაში დიახაც შარდის სუნად ყარს სახელმწიფო ბიძინა ივანიშვილის პირობებში. ადამიანებს ბიძინა ივანიშვილის გინებისთვის და ქართული ოცნების გინებისთვის შარდს სახეზე უსმევენ“, განაცხადა ნიკა მელიამ „რუსთავი 2“-ის პირადაპირ ეთერში.