ოთხშაბათს დაკავებულ მარნეულის მერს, თემურ აბაზოვს რუსთავის სასამართლომ აღკვეთის ღონისძიების სახით პატიმრობა შეუფარდა.

მოსამართლის მიერ განაჩენის გამოცხადებამდე თემურ აბაზოვმა სასამართლო პროცესზე განაცხადა, რომ ელჩინ ალახვერდიევს საკუთარი პარტიის წევრებმა დაურეკეს და უთხრეს, რომ ბოდიში უნდა მოეხადა.

„ამ კაცს დაურეკეს საკუთარი პარტიის წევრებმა და უთხრეს, რომ ბოდიში უნდა მოეხადა. წახვალ და აბაზოვს ბოდიშს მოუხდიო. მე ვუთხარი წაშალეთქო, არასასიამივნო იყო ეს ვიდეო, გინება რა სასიამოვნო იყო. ვისაც ვიცნობდი, ვისთანაც კონტაქტი მქონდა, რომ წაეშალათ. რაც შეეხება ქვეყნიდან წასვლას, რა გასვლა, ერთხელ ვიყავი პრემიერთან ერთად პრეზიდენტის თვითმფრინავით, როცა საზღვარზე გავდიოდი, შს მინისტრთან შეთანხმებით მივდიოდი და ეს იყო სამსახურეობრივი“, განაცხადა თემურ აბაზოვმა, რომლის სიტყვების ციტირებასაც საზოგადოებრივი მაუწყებელი აქვეყნებს.

მარნეულში მოქალაქე ელჩინ ალახვერდიევის მიმართ განხორციელებული დამამცირებელი და არაადამიანური მოპყრობის ბრალდებით პროკურატურამ გუშინ მარნეულის მუნიციპალიტეტის მერი თემურ აბაზოვი დააკავა, ხოლო ამავე მოქალაქის ცემის ფაქტზე, სისხლის სამართლებრივი დევნა დაიწყო საქართველოს პარლამენტის წევრის, პარტია „ერთიანი ნაციონალური მოძრაობიდან“ აზერ სულეიმანოვის, მარნეულის მუნიციპალიტეტის საკრებულოს წევრის, პარტია „ქართული ოცნებიდან“ რამინ ალახვერდიევის და მარნეულის მერის ნათესავის, მოქალაქე ე.გ-ს მიმართ.