თურქეთის ლიდერმა რეჯეფ თაიფ ერდოღანმა ქვეყნის საპრეზიდენტო არჩევნების პირველივე ტურში გაიმარჯვა, როგორც ამას საარჩევნო კომისიის ხელმძღვანელი იტყობინება.

სადი გუვენმა განაცხადა, რომ პრეზიდენტმა „ამომრჩეველთა აბსოლუტური უმრავლესობის ხმები მიიღო“, მაგრამ მას შემდგომი დეტალები არ მოუცია.

სახელმწიფო მედიის ცნობით, იმ ფონზე, როცა ხმების უმეტესი ნაწილი - 99% დათვლილია, ერდოღანს 53% აქვს მიღებული, მის მთავარ მეტოქეს მუჰარემ ინჯეს კი 31%. მაგრამ ოპოზიცია სადავოდ მიიჩნევს ამ მონაცემებს. არჩევნების შედეგები ოფიციალურად პარასკევს გამოცხადდება.

ერდოღანმა საარჩევნო კომისიის თავმჯდომარის განცხადებამდე თქვა, რომ საპრეზიდენტო არჩევნების არაოფიციალური შედეგები აჩვენებს, რომ მან არჩევნები პირველივე ტურში მოიგო.

ერდოღანმა ასევე განაცხადა, რომ მისმა მმართველმა ალიანსმა, „სამართლიანობის და განვითარების პარტიამ“ პარლამენტში უმრავლესობა მოიპოვა.

საპარლამენტო არჩევნების ხმების 96%-ის დათვლის შედეგეებით პრეზიდენტის პარტია 43%-ით ლიდერობს, როგორც ამას ახალი ამბების სახელმწიფო სააგენტო „ანადოლუ“ იტყობინება. მთავარ ოპოზიციურ ძალას, CHP-ს კი 23% აქვს მიღებული.

სახელმწიფო ტელევიზიის ცნობით, საარჩევნო უბნებზე ამომრჩეველთა 87% გამოცხადდა.

თურქეთში რიგგარეშე საპრეზიდენტო და საპარლამენტო არჩევნები კვირას, 24 ივნისს გაიმართა. 

საკუთარი არჩევანის დაფიქსირების შემდეგ მოქმედმა პრეზიდენტმა, რეჯეფ თაიფ ერდოღანმა განაცხადა, რომ ამომრჩეველთა მაღალ აქტივობას ჰქონდა ადგილი. მან იმთავითვე გამოხატა იმედი, რომ ხმების 50%-ზე მეტს მიიღებდა, რითაც თავიდან აიცილებდა მეორე ტურს.

„ამ არჩევნებით თურქეთი დემოკრატიული რევოლუციის გზით მიდის“, განაცხადა ერდოღანმა სტამბოლში ხმის მიცემის შემდეგ ჟურნალისტებთან კომენტირებისას.

თურქეთში მიმდინარე საპრეზიდენტო და საპარლამენტო არჩევნებში ამომრჩეველმა არჩევანი ამჯერადაც ქვეყნის ამჟამინდელ ლიდერზე, რეჯეფ თაიფ ერდოღანზე გააკეთა, რომელიც პრემიერ მინისტრის პოსტზე ხანგრძლივად მოღვაწეობის შემდეგ, პრეზიდენტის თანამდებობაზე მეორე ვადით იყრიდა კენჭს. კრიტიკოსები შიშობენ, რომ ქვეყანაში, სადაც 2016 წლის ივლისის სახელმწიფო გადატრიალების მცდელობის შემდეგ ჯერ კიდევ საგანგებო მდგომარეობაა დაწესებული და სადაც 2017 წლის რეფერენდუმზე პრეზიდენტის ძალაუფლების განმტკიცებას დაუჭირეს მხარი, ერდოაღანის არჩევით, დემოკრატიული მმართველობა კიდევ უფრო შესუსტდება.

ერდოღანის მთავარი მეტოქე „რესპუბლიკური სახალხო პარტიის“ კანდიდატი მუჰარემ ინჯე იყო..

თურქეთში საპრეზიდენტო არჩევნები წესით, 2019 წლის ნოემბერში უნდა გამართულიყო, მაგრამ ერდოღანმა რიგგარეშე არჩევნების ჩატარების გადაწყვეტილება მიიღო.

ერდოღანმა და მისმა მთავარმა მეტოქემ მუჰარემ ინჯემ შაბათს, საარჩევნო კამპანიის ბოლო დღეს, უზარმაზარი დემონსტრაციები მოაწყვეს და ორთავემ ერთმანეთს თურქეთის მმართველობისთვის შეუფერებელი უწოდა.

„თუკი ერდოღანმა გაიმარჯვა, თქვენი ტელეფონების მოსმენა გაგრძელდება... გაგრძელდება შიშის ქვეშ ცხოვრება... თუკი ინჯე გაიმარჯვებს, სასამართლოები დამოუკიდებელი იქნება“, განაცხადა ინჯემ და დაამატა, რომ იგი თურქეთში საგანგებო მდგომარეობას არჩევიდან 48 საათში გააუქმებს. 

56 მილიონზე მეტი ამომრჩეველი იყო დარეგისტრირებული 180 000 საარჩევნო უბანზე მთელი თურქეთის გასწვრივ. ხმის მიცემა ადგილობრივი დროით დილის 8:00 საათზე დაიწყო და 17:00 საათზე დასრულდა.