ხორავას ქუჩაზე მომხდარი მკვლელობის საქმის შემსწავლელი დროებითი საგამოძიებო კომისიის წევრი მამუკა მდინარაძე აცხადებს, რომ მძღოლი, რომელიც ხორავას ქუჩაზე დაპირისპირებას შეესწრო, საგამოძიებო კომისიას ჩვენებას არ აძლევს იმასთან დაკავშირებით, თუ როგორ განვითარდა მოვლენები მოზარდებს შორის დაპირისპირების დროს.

მამუკა მდინარაძის თქმით, „რთულია იმის დაჯერება, რომ 5 მეტრში უყურებდე მოვლენების განვითარებას და მერე არ გახსოვდეს ამის შესახებ არაფერი".

„საქმეში არის უამრავი მოწმის ჩვენება, რომ ის ადამიანი, რომელიც გამოვკითხეთ, იყო შემთხვევის ადგილიდან სულ რამდენიმე მეტრის დაშორებით. და ამ ფონზე, ძალიან სამწუხაროა, რომ ეს ადამიანი ვერაფერს იხსენებს და არ იძლევა ჩვენებას იმასთან დაკავშირებით, თუ რა მოხდა, დეტალებზე საუბარი ზედმეტია. ეს ადამიანი იმყოფებოდა შემთხვევიდან სულ რამდენიმე, 5 მეტრში მაქსიმუმ და ამის ფონზე, ძალიან სამწუხაროა, რომ რამე ხელშესახებ ინფორმაციას ეს ადამიანი არ იძლევა. მე დასკვნებისგან თავს შევიკავებ, ყოველ შემთხვევაში, ძალიან რთულია იმის დაჯერება, რომ 5 მეტრში უყურებდე მოვლენების განვითარებას და მერე არ გახსოვდეს ამის შესახებ არაფერი", აცხადებს მამუკა მდინარაძე.

ხორავას ქუჩაზე მომხდარი მკვლელობის მოწმე უშუალოდ შემთხვევის ადგილას იმყოფებოდა, საკუთარ ავტომობილში იჯდა და სისხლიან გარჩევას უყურებდა, თუმცა მოზარდების ჩხუბში არ ჩარეულა.

საქმის შემსწავლელი დროებითი საგამოძიებო კომისიის წევრები ამ წუთებში შემთხვევის ადგილზე იმყოფებიან.