გამომძიებელი: „გადაუდებელი აუცილებლობიდან გამომდინარე კამერების ჩანაწერების ამოღება არ მოხდა,  ჩანაწერებს საფრთხე არ ემუქრებოდა“ – ამის შესახებ შინაგან საქმეთა სამინისტროს თბილისის პოლიციის დეპარტამენტის დეტექტივების სამმართველოს პირველი განყოფილების  გამომძიებელმა, ირაკლი ფიფიამ პარლამენტში.

მან დროებითი საგამოძიებო კომისიის სხდომაზე განაცხადა: „უპირველეს ყოვლისა რაც უნდა აღინიშნოს, არის ის, რომ უშუალოდ შემთხვევის ადგილს – ფარდულს ან მის მიმდებარე ეზოს ვგულისხმობ, ხორავას ქუჩის N4-ის ეზოში არც ერთი ვიდეოკამერა არ არის დამონტაჟებული. შესაბამისად, ცნობების მიღება ვერ ხერხდება კამერების არარსებობის გამო. ამის შემდეგ, ხელმძღვანელობის მიერ იქმნება  ოპერატიული ჯგუფი და ამ ჯგუფის წევრებს აქვთ ასეთი კონკრეტული დავალება, უნდა ნახონ შემთხვევის ადგილის და მიმდებარედ არის თუ არა ვიდეოკამერები, ეს ვიდეოკამერები ახორციელებენ თუ არა ჩაწერას, დადებით შემთხვევაში რამდენი ხანი ინახება?, რომელი სერვერიდან შეიძლება მისი ამოღება? და ასევე, შეძლებისდაგვარად, დაადგინონ ამ კამერების ჩანაწერებზე თუ რა ინფორმაცია არის ასახული.

 ზუსტადაც ამ დავალების შესაბამისად გარკვეული იქნა, თუ რამდენი კამერა იყო შემთხვევის ადგილას და მის მიმდებარე ტერიტორიაზე, რა რადიუსით აკეთებდა ეს კამერები ჩანაწერს ანუ რა არეალს უყურებებდა, რაც გაირკვა, იყო ის, რომ შემთხვევის ადგილის და მიმდებარე ტერიტორიაზე არსებული კამერების ჩანაწერები ინახებოდა რამდენიმე დღის განმავლობაში. აღნიშნულიდან გამომდინარე, ჩვენ დავდექით ასეთი მოცემულობის წინაშე, გვაქვს მიმდებარე ტერიტორიები, რომლის ჩანაწერებიც ინახება რამდენიმე დღის განმავლობაში, ანუ არ გვაქვს იმის საფრთხე, რომ კამერიდან ჩანაწერი წაიშალოს სამ საათში, პირობითად ვამბობ. აღნიშნულიდან გამომდინარე, არ ხდება ვიდეოკამერების ჩანაწერების გადაუდებელი აუცილებლობიდან გამომდინარე ამოღება.

 რატომ?- გადაუდებელი აუცილებლობა არ გვაქვს, ვინაიდან კამერების ჩანაწერებს არ ემუქრება საფრთხე და მის გადამალვას ან განადგურებას, რადგან მასზე ოპერატიული ჯგუფი მუშაობს, ხოლო იმ შემთხვევაში თუ ჩვენ ამას ამოვიღებდით იყო დიდი რისკი იმისა, რომ სასამართლოს არ დაეკმაყოფილებინა ეს შუამდგომლობა გამოთხოვის კანონიერების შესახებ და შეიძლებოდა გამხდარიყო დაუშვებელი მტკიცებულება. აღნიშნულის გამო, ჩვენ არ წავედით ამ რისკზე,რადაგნ გვეშინოდა  არ დაგვეკარგა ინფორმაციას“, – განაცხადა ფიფიამ.

მისივე თქმით, მოხდა გამოკითხვა იმ ობიექტების მეპატრონეების, ასევე იმ პირების, ვისაც უშუალოდ შემხებლობა ჰქონდა ამ კამერების ჩანაწერებთან, რომლის საფუძველზეც დადგინდა გარემოებები. „ასევე, აღნიშნულის შემდეგ, პროკურორის მიერ მოხდა შუამდგომლობით მიმართვა სასამართლოსთვის, ავიღეთ შესაბამისი განჩინებები და სწორედ ამ განჩინების საფუძველზე მოხდა ვიდეოკამერების ჩანაწერების გამოთხოვა, მაგრამ ეს ისე არ უნდა აღვიქვათ და ისე არ უნდა გავიგოთ, რომ ჩვენ ამდენი დღის განმავლობაში ვიყავით გულ-ხელ დაკრეფილი და არ გვაინტერესებდა, რა ხდებოდა ამ კამერებზე. როგორც მოგახსენეთ, ხელმძღვანელობის მიერ მიეცა ოპერატიულ ჯგუფს კონკრეტული დავალებები და მოძიებულ იქნა ინფორმაცია იმის შესახებ, თუ რა იყო აღბეჭდილი მოცემულ ვიდეოჩანაწერებზე“.განაცხადა ფიფიამ.