არ დავუშვებთ, რომ გიგა ოთხოზორიას საკითხი არ იქნას განხილული გალის ფორმატში. ეს ჩვენი პრინციპული პოზიცია იქნება, განაცხადა პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა.

„ჩვენი პრინციპული პოზიციაა და მინდა ხაზი გავუსვა, არ დავუშვებთ აფხაზებმა ან რუსებმა წამოაყენონ ულტიმატუმი იმ მეტად მნიშვნელოვან, მტკივნეულ საკითხებზე, რომელიც ეხება ჩვენი თანამოქალაქეების ჯანმრთელობას და სიცოცხლეს ოკუპირებულ ტერიტორიებზე. არ დავუშვებთ, გალის ფორმატში არ იქნას განხილული ოთხოზორიას საკითხი“, უთხრა ჟურნალისტებს სესიაშვილმა.

„ქართული ოცნების“ დეპუტატი არ გამორიცხავს, რომ აღნიშნულთან დაკავშირებით საკომიტეტო მოსმენაც გაიმართოს.

„არ გამოვრიცხავ, რომ ამ საკითხზე საკომიტეტო მოსმენაც კი ჩავატარო, იმიტომ, რომ ჩვენ, ვფიქრობ, რომ ამ შემთხვევაში, არა მხოლოდ დანაშაულზე პასუხი უნდა მოვითხოვოთ, არამედ ჩვენი პრინციპულობით უნდა მოვახდინოთ პრევენცია იმისა, რომ ჩვენი თანამოქალაქეები დაცულად იყვნენ და ოკუპანტებმა, აფხაზებმაც და ცხინვალის ე.წ. ხელისუფლებამაც კარგად იცოდნენ, რომ ჩვენ ასეთ არაადამიანურ და არაკანონიერ ქმედებებს არ დავუშვებთ“, განაცხადა ირაკლი სესიაშვილმა.

27 ივნისს, გალში ინციდენტების პრევენციისა და მათზე რეაგირების მექანიზმის ფარგლებში შეხვედრა ჩაიშალა. ოკუპირებული აფხაზეთის და რუსული მხარის წარმომადგენლებმა ქართულ მხარეს შეხვედრის დაწყებისას დღის წესრიგიდან გიგა ოთხოზორიას მკვლელობის საკითხის ამოღება მოსთხოვეს, წინააღმდეგ შემთხვევაში კი, განაცხადეს, რომ შეხვედრას დატოვებდნენ. საპასუხოდ მათ ქართული მხარის წარმომადგენლებმა განუცხადეს, რომ ეს საკითხი ქართული მხარისთვის პრინციპული და მნიშვნელოვანია, რის შემდეგაც დე ფაქტო აფხაზეთის და რუსეთის ფედერაციის წარმომადგენლებმა შეხვედრა დატოვეს.