ისრაელმა ღაზაში „ჰამასის“ მებრძოლთა სამიზნეების წინააღმდეგ თავისი ყველაზე მასშტაბური თავდასხმა განახორციელა 2014 წლის ომის შემდეგ, განაცხადა პრემიერ მინისტრმა ბენიამინ ნეთანიაჰუმ.

მისი თქმით, რეიდები ისრაელის მიმართულებით რაკეტების გაშვების საპასუხო იყო. „ჰამასმა“ განაცხადა, რომ ცეცხლის შეწყვეტის შეთანხმებას მიაღწიეს, მაგრამ როგორც BBC იუწყება, კვლავ ვრცელდება ინფორმაციები ორმხრივი ცეცხლის შესახებ.

პალესტინის ჯანდაცვის ოფიციალური პირების თქმით, მოკლულია 2 და დაჭრილია 12 ადამიანი ქალაქ ღაზაში შაბათს განხორციელებული საჰაერო დარტყმების შედეგად.

ისრაელის თავდაცვის ძალებმა განაცხადეს, რომ მათ დარტყმა მიაყენეს იმ ობიექტებს, რომელსაც „ჰამასი“ იყენებს, მათ შორის ბეით ლაჰიაში მდებარე ბატალიონის შტაბ-ბინას - სამწვრთნელო ბანაკს, რომელიც ჩრდილოეთ ღაზაში ალ-შატის დევნილთა ბანაკის მაღალსართულიან შენობაშია განთავსებული და სადაც იარაღის საწყობები და რაკეტის გამშვები მოწყობილობებია მოთავსებული.

„ისრაელის სახელმწიფოს თავდაცვის მინისტრთან, ადმინისტრაციის ხელმძღვანელთან და უსაფრთხოების უმაღლეს ოფიციალურ პირებთან კონსულტაციების შემდეგ, ჩვენ გადავწყვიტეთ მძლავრი ქმედებების განხორციელება „ჰამასის“ ტერორიზმის წინააღმდეგ“, განაცხადა ნეთანიაჰუმ ვიდეო განცხადებაში, სადაც აღნიშნა, რომ ისრაელის თავდაცვის ძალებმა „ყველაზე მძიმე დარტყმა მიაყენეს“ ჰამასს 2014 წლის კონფლიქტის შემდეგ და საჭიროების შემთხვევაში ისრაელი დარტყმებს კიდევ უფრო ინტენსიურს გახდის.

მიუხედავად ამისა, პალესტინის ოფიციალურმა პირებმა განაცხადეს, რომ „ეგვიპტის და საერთაშორისო ძალისხმევით“ ახლა ცეცხლის შეწყვეტის შეთანხმებას მიაღწიეს. თუმცა ამის შესახებ ისრაელს კომენტარი ჯერ არ გაუკეთებია.

თვითმხილველებმა ახალი ამბების სააგენტო „როიტერსს“ განუცხადეს, რომ ქალაქ ღაზაში დარტყმები ცარიელ შენობაზე განხორციელდა და დაღუპულები შემთხვევით გამვლელები არიან.