საპრეზიდენტო არჩევნებში ოპოზიციის კანდიდატის გამარჯვებაში დარწმუნებულია ეროვნულ-დემოკრატიული პარტიის“ თავმჯდომარე ბაჩუკი ქარდავა, რომელიც აცხადებს, რომ ოპოზიციური ერთობის მთავარი ამოცანა საპრეზიდენტო არჩევნების კვალდაკვალ, „ხელისუფლების სრული ცვლილება“ იქნება.

„ის 9 სუბიექტი, რომელიც აქ არის შეკრებილი, მუშაობს ერთად, მაგრამ ეს მხოლოდ დასაწყისია და მე დარწმუნებული ვარ, რომ ძალიან ბევრი პოლიტიკური ორგანიზაცია და საზოგადოებრივი ჯგუფი ამ ერთობას კიდევ შემოუერთდება. ჩვენ აუცილებლად გვეყოლება, ამაში დარწმუნებული ვარ და არ გაგვიჭირდება, ღირსეული, ძლიერი კანდიდატი, რომელიც იბრძოლებს არა საპრიზო ადგილისათვის ამ არჩევნებში, არამედ ხელისუფლების შესაცვლელად. საპრეზიდენტო არჩევნების კვალდაკვალ, ჩვენი მთავარი ამოცანა არის ხელისუფლების სრული ცვლილება“, განაცხადა „რუსთავი 2“-თან საუბრისას ბაჩუკი ქარდავამ.

9 ოპოზიციური სუბიექტი, მათ შორის, „ერთიანი ნაციონალური მოძრაობა“, „ახალი საქართველო“ და „ეროვნულ-დემოკრატიული პარტია“, ერთიანი საპრეზიდენტო კანდიდატის დასახელებას სამშაბათს გეგმავს.