ისნის მაჟორიტარი დეპუტატი დავით ჭიჭინაძე „კურიერთან“ საუბრისას აცხადებს, რომ მისთვის უმრავლესობიდან არ დაურეკავთ და პარტიიდან გარიცხვის თაობაზე ინფორმაცია მედიისგან შეიტყო. მანვე აღნიშნა, რომ ელოდება კიდევ ვის გარიცხავენ მმართველი პარტიის რიგებიდან, რომ მათთან ერთად ახალი ფრაქცია - „ქართული ოცნება 2012“ ჩამოაყალიბოს.


დავით ჭიჭინაძე აცხადებს, რომ თუ უმრავლესობის წევრები ასეთ საკითხებში ბიძინა ივანიშვილს უთანხმდებიან, მაშინ არ ქონია მათ თანამდებობებზე ყოფნას აზრი.


მანვე დაამატა, რომ მისი პარტიიდან გარიცხვის გადაწყვეტილებით უმრავლესობის ხუთივე წევრმა თავიანთი თავები დააკნინა.


„რაც შეეხება ბიძინა ივანიშვილს, არც მაგას მივუღივარ პარტიაში, არც მაგას მიუღია გადაწყვეტილება ჩემი მაჟორიტარად წარდგენისას და მე ვფიქრობ, ამ ადამიანის ხელმოწერაც არ არის. ეს, როგორც იტყვიან, არა მეფის საქმეა. რიგითი დეპუტატის პარტიიდან გარიცხვა ეგეთ დონეზე არ წყდება. თუმცა, ქალბატონი თამარ ჩუგოშვილი იძახის, რომ შეუთანხმეს ეს საკითხი. არ ვიცი ამითი რა თქვეს, ვერ გავიგე. ამით, ამ ხუთმა ადამიანმა ისევ და ისევ თავიანთი თავები დააკნინეს. მაშინ რატომ აქვთ ეს თანამდებობები, თუ კიდე ვიღაცას უთანხმებენ?! ესეც გაუგებარია. მაშინ გააუქმონ ეს თანამდებობები და იყოს პირდაპირ მრჩეველთა საბჭო, რომელიც მიიღებს დავალებას და შეასრულებს“, განაცხადა დავით ჭიჭინაძემ.


ისნის მაჟორიტარი დეპუტატი ამბობს, რომ ის ირაკლი კობახიძესთან ბრძოლაში გამარჯვებულია, რადგან ის თავისუფალი აზრის გამოთქმისთვის დაითხოვეს პარტიიდან და ამის შემდგომ უფრო თავისუფლად გამოხატავს აზრს.


დავით ჭიჭინაძემ მოუწოდა უმრავლესობის სხვა წევრებს, არ დატოვონ პარიის რიგები და გამოხატონ თავიანთი დამოკიდებულება უფრო თავისუფლად.


„მე ვფიქრობ, რომ გამარჯვებული ვარ, იქიდან გამომდინარე, რომ მე ბევრად უფრო თავისუფლად შემიძლია ამ ადამიანებს წავუყენო ის პრეტენზიები, რომლებიც საზოგადოებას მათ მიმართ გააჩნია. ჩემთვის, იმ განცხადების შინაარსი და შემდეგ კომენტარი ქალბატონი თამარ ჩუგოშვილის და ბატონი ზაქარია ქუცნაშვილის, ეს იყო კიდევ ერთი პოლიტიკური აღმოჩენა. მე დავტკბი იმით, რომ ზაქარია ქუცნაშვილსა და თამარ ჩუგოშვილს თურმე ერთნაირი შეხედულება ქონიათ დემოკრატიაზე, მორალზე და ეთიკაზე“, განაცხადა პარტიიდან გარიცხულმა დეპუტატმა და დაამატა:

„მე ვაპირებ ჩემი საქმის დამოუკიდებლად გაგრძელებას და ველოდები შემდეგს ვის გამოყრიან და შევგროვდებით. მე ვფიქრობ, რომ ჩვენს ფრაქციას „ქართული ოცნება 2012“-ს დავარქმევთ“.