გიორგი კვირიკაშვილს აღარ შეეძლო მართვა და ის უნდა წასულიყო, აცხადებს ბიძინა ივანიშვილი საზოგადოებრივი მაუწყებლის გადაცემის - „აქტუალური თემა მაკა ცინცაძესთან ერთად“ ანონსში.

ბიძინა ივანიშვილის თქმით, მისი პოლიტიკაში დაბრუნების მიზეზი იყო ის, რომ „ძალიან დიდი იყო ხიფათი გუნდის დაშლის“, რაც მისი თქმით, „უკვე დაწყებული იყო“.

„ძალიან მძიმედ ვიყავი რამდენიმე დღე, როდესაც ვნახე, რომ საზოგადოების გარკვეულ ნაწილს პოლიტიკაში „ქართული ოცნების“ შემდგომ სიღარიბის ზღვარი გაუუარესდა, ორმა ბანკმა გადაჭამა მთელი ქვეყანა. ირღვეოდა ბალანსი სახელმწიფოს ინტერესებს და ბიზნესის ინტერესებს შორის და არღვევდა მას კვირიკაშვილი თავისი ქმედებებით. მას აღარ შეეძლო მართვა. ორ კაცთან - ალავიძესთან და ქუმსიშვილთან ახერხებდა ის გადაწყვეტილებების შეთანხმებას. მას არ დარჩა არჩევანი და ის უნდა წასულიყო და წავიდა კიდეც“, აცხადებს ივანიშვილი.

ჟურნალისტის შეკითხვაზე - თუ ვინ იქნება „ქართული ოცნების“ საპრეზიდენტო კანდიდატი, ივანიშვილი ასე პასუხობს: „ზურა აბაშიძე, სოზარ სუბარი, სერგეენკო, ჩემზეც ამბობენ, თეა წულუკიანი და კიდევ ბევრი ღირსეული კანდიდატი გვყავს ჩვენ, ვინც მართლა შეიძლება რომ პირველსავე ტურში მოახერხოს და გაიმარჯვოს“.

გადაცემა პირველ არხზე სამშაბათს, 24 ივლისს, საღამოს 21:45 საათზე გავა.