მარგველაშვილმა მოახერხა, იმ რვა მილიონიან საქმეს, რომელიც სააკაშვილმა ბიუჯეტიდან უკანონოდ დახარჯა, პიჯაკების საქმე უწოდა და ის პოლიტიკურ დევნილადაც კი დაასახელა. ეს კაცი არ იმსახურებს ამ კითხვებზე პასუხის გაცემას ჩემგან, განაცხადა ბიძინა ივანიშვილმა საზოგადოებრივი მაუწყებლის ეთერში, გადაცემაში - „აქტუალური თემა მაკა ცინცაძესთან ერთად“.

„პროცესი მიდის, მე არ დავასწრებ მოვლენებს და ვერც დავასწრებ. მე ვფიქრობ, რომ ეს ნორმალურია. ყველა დემოკრატიულ სახელმწიფოში შეიძლება მსგავსი რამ მოხდეს, მაგრამ იმას, რასაც ეს კაცი კითხულობს, რომ ეს საქმე „ტრაქტორების“ ან „კაბელების“ თემას არ დაემსგავსოს, და კითხვას სვამს, პასუხს არ იმსახურებს. რამეთუ მან მოახერხა, იმ რვა მილიონიან საქმეს, რომელიც სააკაშვილმა ბიუჯეტიდან უკანონოდ დახარჯა, პიჯაკების საქმე უწოდა და ის პოლიტიკურ დევნილადაც კი დაასახელა. ეს კაცი არ იმსახურებს ამ კითხვებზე პასუხის გაცემას ჩემგან. თუმცა, რადგან კითხვა დაისვა, საზოგადოებას მაინც შევახსენებ, რომ ე.წ. „ტრაქტორების“ საქმე ჩემთვის დღესაც საამაყოა. მე მაშინ პრემიერ მინისტრი გახლდით, დათო კირვალიძე იყო სოფლის მეურნეობის მინისტრი, რომელიც მე ჩემს ფავორიტ მინისტრად დავასახელე. როდესაც პროკურატურიდან გაჩნდა კითხვა, მე მისი დაცვა კი არ დავიწყე, მას ვთხოვე პროკურატურისთვის საშუალება მიეცა და გამოძიების პროცესში ის გადამდგარიყო. მან ეს გააკეთა კიდეც. ის განცდა, რომ მე კირვალიძეს ფორმალურად ვასახელებდი ფავორიტად, დღესაც დამრჩა. მე მასთან დღესაც ვმეგობრობ და რამდენიმე დღის წინ მეგობრული შეხვედრაც მქონდა და სოფლის მეურნეობის საკითხებზეც ვისაუბრეთ. აი ეს არის ხელწერა, რაც ჩვენ გუნდში მოვიტანეთ და მე ეს ძალიან მეამაყება. როდესაც ამას უარყოფით კონტექსტში გვახსენებენ, სამწუხაროა, რომ საზოგადოების გარკვეული ოპოზიციური ნაწილი ნაციონალური მოძრაობის რიტორიკაზე გადავიდა ბოლომდის და მას იზიარებენ. ამ დროს, აქ კითხვა არ უნდა დაისვას, ეს არის სწორედ ის ხელწერა, რაც ჩვენ მოვიტანეთ და მასშივე ჯდება ეს ე.წ „კაბელების“ საქმეც“, განაცხადა ბიძინა ივანიშვილმა.