საქართველოს პრეზიდენტმა, გიორგი მარგველაშვილმა ამ წუთებში მიმდინარე ბრიფინგზე განაცხადა, რომ მხარს უჭერს საკონსტიტუციო სასამართლოს გადაწყვეტილებას მარიხუანას ლეგალიზაციასთან დაკავშირებით.

მისი თქმით, სახელმწიფო ინსტიტუტების მიმართ პატივისცემას უნდა ჰქონდეს ადგილი.

„ასეთ საკითხებზე ჩატარებული გამოკითხვები რამდენად ასახავს მოსახლეობის შეხედულებებს, საეჭვოა. მოდით, ასე ვთქვათ - მოსახლეობის 75% ფიქრობს, რომ მარიხუანის მოხმარება კარგი და დადებითი ჩვევა არაა. მე შეიძლება შევუერთდე ამ 75%-ს, შეიძლება შევუერთდე იმ 90%-ს, ვისაც მიაჩნია, რომ სიგარეტის მოხმარება კატასტროფაა. შემიძლია იმ 100%-ს შევუერთდე, ვისაც ალკოჰოლის ზედმეტი მოხმარება ცუდად მიაჩნიათ. ჩვენ უნდა გავავლოთ ზღვარი, ცუდი და კარგი ჩვევა ერთია, და მე ვიზიარებ იმ ადამიანების პოზიციას, ვისაც არც ალკოჰოლის, არც მარიხუანის, არც ნიკოტინის მოხმარება მიაჩნიათ სწორად, მაგრამ მეორე საკითხია, რამდენად უნდა ჩავსვათ ამის გამო ადამიანები ციხეში. ჩვენ უნდა ვისწავლოთ ამ ზღვარის გავლება. ამის შინაარსიდან გამომდინარე, ლაპარაკია იმაზე, რომ ადამიანები ამის გამო ციხეში არ უნდა იყვნენ. სრულიად სწორი, თავისუფლებაზე ორიენტირებულია საკონსტიტუციო სასამართლოს გადაწყვეტილება. შეიძლება მოსახლეობის ასივე პროცენტი არ დაეთანხმოს ამ გადაწყვეტილებას და, შესაძლოა, თავად მოსამართლეებიც არ თვლიან, რომ მარიხუანის მოხმარება კარგია, მაგრამ ამ ზღვარის ცოდნაა საჭირო. ერთია, არ მოგწონდეს რაღაც, და მეორეა, ამის გამო ადამიანებს ციხეში სვამდე. თავისუფალი საზოგადოება ამ ზღვარს ძალიან აფართოებს და რაც უფრო გავაფართოვებთ ამ ზღვარს და მივცემთ მათ საშუალებას, თვითონ აირჩიონ როგორ მოიქცნენ, მით უფრო თავისუფლები ვიქნებით. ასე რომ, მე მხარს ვუჭერ საკონსტიტუციო სასამართლოს გადაწყვეტილებას და მიმაჩნია, რომ სრულიად უპასუხისმგებლოა საკონსტიტუციო სასამართლოზე გახორციელებული თავდასხმები. ამ ბოლო დროს, ამგვარ ინსტიტუტებს, ძალიან ხშირად ესხმიან თავს მარჯვნიდან, მარცხნიდან, ზევიდან და ქვევიდან და თუ ამ ინსტიტუტებს დავანგრევთ, მაინტერესებს, ვინ დაიცავს ნებისმიერ კანონს?!“, განაცხადა გიორგი მარგველაშვილმა.