სააკაშვილის ხელისუფლების საგარეო საქმეთა მინისტრის, ამჟამად, პრეზიდენტობის კანდიდატის, სალომე ზურაბიშვილის მიერ გაკეთებული განცხადების შემდეგ, რომ 2008 წლის აგვისტოში საომარი მოქმედებები საქართველომ დაიწყო, პარტია „დემოკრატიული მოძრაობის“ ლიდერი ნინო ბურჯანაძე TV პირველის ეთერში, „დღის ამბები დიანა ტრაპაიძესთან ერთად“ ასევე აცხადებს, რომ ის რჩება იმავე პოზიციაზე, რომ საომარი მოქმედებები დაიწყო საქართველომ. ბურჯანაძემ ასევე თქვა, რომ პუტინს მიხეილ სააკაშვილი გაფრთხილებული ჰყავდა, რომ საომარი მოქმედებები არ დაეწყო, რადგან რუსეთი ომში ჩაერთვებოდა, მაგრამ სააკაშვილის უგუნურმა ქმედებებმა ომის სავალალო შედეგები მოგვიტანა.

„მე ვთქვი თავის დროზე, რომ ეს ომი დაწყებული იქნა სააკაშვილის უგუნური და აბსოლუტურად უპასუხისმგებლო დანაშაულებების შედეგად და მე ამ პოზიციაზე ვრჩები და ეს პოზიცია აქვს ტალიავინის, ეს პოზიცია აქვს ამერიკის ყოფილ ელჩს საქართველოში, ეს პოზიცია აქვს ყველას, ვისაც აქვს ობიექტური ინფორმაცია ამ ვითარებასთან დაკავშირებით.

ეს პოზიცია არავითარ შემთხვევაში არ გულისხმობს ოკუპაციის გამართლებას. ეს არის იმ ადამინების პოზიცია, ვისაც უბრალოდ არ ყოფნის გამბედაობა, რომ თქვას სიმართლე, ვინც სპეკულირებს, არანაირი გამართლება არ არის. მე ჩემი კამპანია 2016 წელს, საპარლამენტო წარვმართე, სწორედ იმის მიმართულებით, რომ ყველა უცხო ჯარი საქართველოს ტერიტორიიდან უნდა გასულიყო, რა თქმა უნდა, რუსული ჯარიც გულისხმობდა ბუნებრივია ამაში, სად არის აქ ოკუპაციის გამართლება, რუსული სამხედრო ბაზების საქართველოს ტერიტორიაზე გამართლება.

მე არსად არ მითქვამს, რომ კარგია, რაც რუსეთმა გააკეთა, მაგრამ რუსეთის მხრიდან ეს იყო პასუხი და ეს პასუხი იყო მოსალოდნელი. სააკაშვილი ამის თაობაზე გაფრთხილებული იყო, ჯერ კიდევ აპრილში და ამის შესახებ გააფრთხილა პირადად ვლადიმერ პუტინმა და უთხრა, რომ „შენ თუ დაიწყებ საომარ მოქმედებებს იქ, სადაც დგანან ჩემი სამშვიდობო ძალები, იძულებული გავხდები ჩაერიონ და არ გააკეთო ეს“. ეს სააკაშვილმა თვითონ არ თქვა?, მე ეს არ ვთქვი, სანამ სააკაშვილმა არ განაცხადა, იმიტომ რომ არ გამომსვლოდა ესე, რაღაც საუბრის გახმოვანება“, აღნიშნა ნინო ბურჯანაძემ.