საქართველოს პრემიერ მინისტრმა, მამუკა ბახტაძემ დღეს დილით გამართულ ბრიფინგზე 2008 წლის რუსეთ-საქართველოს ომის შესახებ ისაუბრა და განაცხადა, რომ 10 წლის წინ გავლილი დღეები იყო ტრაგიკული და ამ დღეებმა „კიდევ ერთხელ გვაჩვენა, რომ ის გზა, რომელზეც დგას საქართველო და დგას მტკიცედ, გამოწვევებითაა აღსავსე, მაგრამ, ამავე დროს, გვაჩვენა ის, რომ ჩვენი ქვეყნისა და ერის ერთიანობით, ჩვენ აუცილებლად მივაღწევთ იმ მიზანს, რომელიც გვაქვს დამკვიდრებული“.


პრემიერის თქმით, შეხვდა იმ ოჯახებს, რომლებმაც ომის დროს ოჯახის წევრი დაკარგეს. ბახტაძემ აღნიშნა, რომ „განწყობა ერთია - მშვიდობას ალტერნატივა არ აქვს“.


„10 წლის წინ, რუსეთის ფედერაციამ ქართულ სახელმწიფოებრიობაზე კიდევ ერთი აგრესია მიიტანა. ეს იყო ყველაზე ტრაგიკული დღეები ჩვენი ქვეყნის უახლოეს ისტორიაში. რუსული აგრესია, ჩვენი ტერიტორიების ოკუპაცია, მსხვერპლი და ათობით ათასი დევნილი მოუშუშებელი ტკივილია თითოეული საქართველოს მოქალაქისთვის. ეს იყო ძალიან მძიმე დღეები და ამ დღეებმა კიდევ ერთხელ გვაჩვენა, რომ ის გზა, რომელზეც დგას საქართველო და დგას მტკიცედ, გამოწვევებითაა აღსავსე, მაგრამ, ამავე დროს, გვაჩვენა ის, რომ ჩვენი ქვეყნისა და ერის ერთიანობით, ჩვენ აუცილებლად მივაღწევთ იმ მიზანს, რომელიც გვაქვს დამკვიდრებული. მინდა კიდევ ერთხელ განვაცხადო, რომ ჩვენი პასუხი ამ აგრესიასა და გამოწვევაზე არის მშვიდობა და ევროპული ხარისხისა და ფილოსოფიის სახელმწიფო ინსტიტუტების მშენებლობა. აღარაფერი უნდა დაემუქროს ჩვენი ქვეყნის მშვიდობას. მე ამ ორი დღის განმავლობაში ძალიან ბევრი შეხვედრები მქონდა, მათ შორის, იმ ოჯახებთან, რომლებმაც დაკარგეს ძმები, დები, მშობლები, მეგობრები. მინდა გითხრათ, რომ კიდევ ერთხელ დავრწმუნდი, რომ განწყობა ერთია - მშვიდობას ალტერნატივა არ აქვს. ჩვენ უნდა გადავდგათ ნაბიჯი უკეთესი მომავლისკენ. ჩვენ უკვე დავიწყეთ რამდენიმე მნიშვნელოვანი პროგრამის გახორციელება და ამ პროგრამებს, აუცილებლად, მოგახსენებთ. აქვე მინდა კიდევ ერთხელ შეგახსენოთ, რომ შვიდ აგვისტოს საქართველოში ჩამოვიდნენ ლიეტუვას, ლატვიის, პოლონეთის საგარეო საქმეთა მინისტრები და ვიცე პრემიერი. ამასთან ერთად, ყველა ჩვენმა მოკავშირე ქვეყანამ და საერთაშორისო ინსტიტუტებმა, ჩვენი ქვეყნის მხარდასაჭერად, კიდევ ერთხელ, მკაფიო განცხადება გააკეთეს. მსურს, მადლობა გადავუხადო ჩვენს მეგობარ ქვეყნებს იმ მტკიცე მხარდაჭერისთვის, რაც მათ ამ დღეებში გვაჩვენეს“, განაცხადა მამუკა ბახტაძემ ბრიფინგზე.