„ქართული ოცნების“ წევრი, დიმიტრი ხუნდაძე მიიჩნევს, რომ უმჯობესი იქნება „ქართული ოცნება“ საარჩევნო კამპანიაში საკუთარი კანდიდატით ჩაერთოს. იგი, თავის კოლეგებთან ერთად აღნიშნულ წინადადების შეთავაზებას „ქართული ოცნების“ ლიდერებისთვის აპირებს და ამავე დროს არ გამორიცხავს, რომ ეს საკითხი უმრავლესობის ფორმატში კენჭისყრაზეც დადგეს.

„პარტიის თავმჯდომარის არგუმენტები იყო ის, რომ დამოუკიდებელი კანდიდატისთვის დაგვეჭირა მხარი, მაგრამ ახლა საპირისპირო არგუმენტებს წარმოვადგენ. ასევე, თუკი „ქართული ოცნება“ დაუჭერს მხარს დამოუკიდებელ კანდიდატს, ვფიქრობ, რომ დამოუკიდებელი კანდიდატის საპრეზიდენტო სავარძელში ქმედება იქნება ასოცირებული და პასუხსაგები ისევ „ქართული ოცნების“ მხრიდან... ერთ-ერთი დამოუკიდებელი კანდიდატის განცხადებებზე ხშირად ისევ მმართველ გუნდს აკითხავენ პასუხის გასაცემად და პასუხს ისევ თხოვენ მმართველ გუნდს. ასე რომ, მე ვფიქრობ, უმჯობესი იქნება „ქართული ოცნება“ სარჩევნო პროცესში ჩაერთოს საკუთარი კანდიდატით“, განაცხადა ხუნდაძემ.