კახეთში სეტყვისაგან დაზარალებულ მოსახლეობას ვენახებში შეხვდა „ერთიანი ნაციონალური მოძრაობის“ პოლიტიკური საბჭოს თავმჯდომარე ნიკა მელია და საქართველოს დღევანდელი „მილიარდერი ხელისუფალი“ მწვავედ გააკრიტიკა, განაცხადა რა რომ ხელისუფლებაში მოსვლიდან 6 წლის თავზე, ბიძინა ივანიშვილი სეტყვისაგან მოსავალგანადგურებულ „კახელებს ეუბნება, რომ არც ერთი თეთრის და არც ერთი ლარის ღირსი არ ხართო“.

„80 პროცენტი მოსახლეობისა, ვისაც გაუნადგურდა აქ ეხლა მოსავალი, ვალად ჰქონდათ შხამ-ქიმიკატები აღებული. და ამ შხამ-ქიმიკატების ვალის გასტუმრებას აპირებდნენ მას შემდეგ, როდესაც მოსავალს მოიყვანდნენ. და ამ დროს რას აკაეთებს მილიარდერის ხელისუფლება, მილიარდერი ხელისუფალი რას აკეთებს?! ამბობს, რომ არ გეკუთვნით, არ გეკუთვნით კომპენსაცია, ვერ დაგეხმარებით. მაგრამ ახლა გავიხსენოთ, რას აკეთებდა და ამბობდა 2012 წლის აგვისტოში. მაშინდელმა ხელისუფლებამ 150 მილიონი ლარი აუნაზღაურა მოსახლეობას სრულად, კომპენსაცია - 1 500 ლარი თითო ოჯახს. და ბიძინა ივანიშვილი გამოვიდა ტელევიზიით, ძალიან კარგად მახსოვს, 2012 წლის აგვისტოს და თქვა, რომ 1 500 ლარი არის სასაცილო თანხა და უნდა გაიცეს 4 000 ლარი, 3 500 ლარი, მთელი დღეები ამას იმეორებდა. როდესაც 150 მილიონი გამოყოფილი იყო, იმას დასცინოდა, 150 მილიონი რა არისო, 400 მილიონი უნდა გამოყოთო და დღეს, 6 წლის თავზე, კახელებს ეუბნება, რომ არც ერთი თეთრის და არც ერთი ლარის ღირსი არ ხართო“, განაცხადა ნიკა მელიამ.