„ქართული ოცნების“ წევრი სოფიო კილაძე ამბობს, რომ სტრასბურგის სასამართლოში, რაც უფრო მეტი არგუმენტაცია იქნება წარდგენილი საქმესთან დაკავშირებით მით უფრო დაადასტურებენ, რომ ტატუნაშვილის მიმართ დაირღვა ყველა ის უფლება, რაც მას ადამიანის უფლებათა ევროპული კონვენციით ჰქონდა მინიჭებული.

„სტრასბურგის სასამართლოში, რაც უფრო მომზადებულები წავალთ და რაც უფრო მყარი არგუმენტაცია გვექნება საქმესთან დაკავშირებით, მით უკეთესი არის ბუნებრივია. მნიშვნელოვანი არის, რომ სტრასბურგის სასამართლომ რეალურად კიდევ ერთხელ დაადასტუროს ის, რომ ტატუნაშვილის მიმართ დაირღვა ყოველგვარი კონვენციით გარანტირებული უფლება“, განაცხადა კილაძემ.

პარლამენტის ადამიანის უფლებათა კომიტეტის თავმჯდომარე სოფიო კილაძე აცხადებს, რომ „იუსტიციის სამინისტროს მიერ მომზადებული საქართველოს სახელმწიფოს სარჩელი რუსეთის ფედერაციის წინააღმდეგ აუცილებლად იქნება წარმატებული“.

მისი თქმით, მნიშვნელოვანია, რომ ადამიანის უფლებების ევროპულმა სასამართლომ, სამართლებრივად დაამტკიცოს, რომ ოკუპირებულ ტერიტორიებზე რუსეთი უხეშად და სისტემურად არღვევს ადამიანის უფლებებს.

„ჩვენთვის მნიშვნელოვანია, რომ ადამიანის უფლებების ევროპულმა სასამართლომ, კიდევ ერთმა ძალიან ავტორიტეტულმა საერთაშორისო პლატფორმამ სამართლებრივად დაამტკიცოს, რომ ოკუპირებულ ტერიტორიებზე რუსეთი უხეშად და სისტემურად არღვევს ადამიანის უფლებებს. ღრმად ვარ დარწმუნებული, რომ ეს მასობრივი დარღვევა კეთდება იმისთვის, რომ ქართველებს სურვილი აღარ ჰქონდეთ ოკუპირებულ ტერიტორიებზე, საკუთარ მიწაზე დაბრუნების. რუსეთის მიერ ადამიანის უფლებების უხეში დარღვევის მთავარი სამიზნე ეთნიკურად ქართული მოსახლეობაა, რომელსაც უმძიმეს ვითარებაში უწევთ ცხოვრება. ჩვენს ხელთ არის საერთაშორისო ბერკეტები. ადამიანის უფლებათა ევროპული სასამართლო, როგორც ყველაზე ქმედითი სამართლებრივი ინსტრუმენტი ადამიანის უფლებათა დასაცავად არის ყველაზე სწორი საშუალება იმისათვის, რომ კიდევ ერთხელ საერთაშორისო დონეზე, ახლა უკვე სამართლებრივი არგუმენტებით მოხდეს დამტკიცება იმისა, რომ სწორედ რუსეთი არის ოკუპანტი ქვეყანა, რომელიც უხეშად და მასობრივად არღვევს ადამიანის უფლებებს“, აცხადებს სოფიო კილაძე.