ფრაქცია „ევროპული საქართველოს“ პრეზიდენტობის კანდიდატი დავით ბაქრაძე აცხადებს, რომ ანგელა მერკელთან შეხვედრისას მისი გუნდი სამ ძირითად თემაზე აპირებს საუბარს ესენია: საქართველოს დეოკუპაცია, ევროპული მომავალი და ქვეყნის დემოკრატია. ბაქრაძის თქმით, სამივე მიმართულებაში გერმანიის პოზიცია მნიშვნელოვანია საქართველოსთვის.

„მერკელის ვიზიტი არის შესაძლებლობა ვისაუბროთ მასთან სამ ძირითად თემაზე, რომელიც მნიშვნელოვანია საქართველოსთვის. პირველი ეს არის საქართველოს დეოკუპაცია და უსაფრთხოება და აქ გერმანიის როლი, როგორც ევროპული ლიდერის არის უმნიშვნელოვანესი.

მეორე გახლავთ, საქართველოს ევროპული და ევროატლანტიკური ინტეგრაცია და აქაც გერმანიის პოზიცია იქნება განმსაზღვრელი, თუ რამდენად სწრაფად შეძლებს საქართველო ნატო-სა და ევროკავშირში გაწევრიანებას და მესამე – ქვეყანაში მიმდინარე პროცესები, საარჩევნო მზადება და ზოგადად, ქართული შიდა დემოკრატიის მდგომარეობა.

ეს სამი მიმართულება: ჩვენი დეოკუპაცია, ჩვენი ევროპული მომავალი და ქართული დემოკრატია იქნება ძირითადი საკითხები, რომელთა დაყენებასაც ვაპირებთ გერმანიის კანცლერთან შეხვედრაზე“, განაცხადა „ევროპული საქართველოს“ პრეზიდენტობის კანდიდატმა.