„ქართული ოცნების“ მიერ საქართველოს პრემიერ მინისტრის სპეციალური წარმომადგენლის რუსეთთან ურთიერთობის საკითხებში, ზურაბ აბაშიძის პრეზიდენტობის კანდიდატად შესაძლო წარდგენის შესახებ ინფორმაციას უარყოფს პარლამენტის ვიცე-სპიკერი თამარ ჩუგოშვილი.

„ნამდვილად არ გვქონია ამაზე საუბარი. ისიც არ ვიცი, ბატონი ზურაბი აპირებს თუ არა საპრეზიდენტო არჩევნებში მონაწილეობას“, განაცხადა ჩუგოშვილმა და დაამატა, რომ „ქართულ ოცნებას“ ჯერ არ მიუღია საბოლოო გადაწყვეტილება, ვის დაუჭერს მხარს საპრეზიდენტო არჩევნებში.

საპრეზიდენტო კანდიდატის დასახელებასთან დაკავშირებით „ქართული ოცნების“ ბოლო დღეებამდე გახმოვანებული ოფიციალური პოზიციის თანახმად, მმართველი გუნდი თავისი კანდიდატის წარდგენას გამორიცხავდა და რომელიმე დამოუკიდებელი კანდიდატის მხარდაჭერაზე აკეთებდა აქცენტს.

პარტიის აღნიშნული პოზიცია რამდენიმე კვირის წინ პარლამენტის თავმჯდომარემ, ირაკლი კობახიძემ გააჟღერა, თუმცა ორი დღის წინ, პრემიერ მინისტრმა მამუკა ბახტაძემ თქვა, რომ პარტიაში დისკუსია მიმდინარეობს იმასთან დაკავშირებით, ეყოლებათ თუ არა საკუთარი კანდიდატი, რამაც კითხვის ნიშნის ქვეშ დააყენა ირაკლი კობახიძის თავდაპირველად გაკეთებული განცხადება, სადაც მკაფიოდ იყო ნათქვამი, რომ „ოცნება“ საპრეზიდენტო კანდიდატის დაყენებას არ აპირებდა.

„ჩვენ ვაკვირდებით მოვლენებს, ვაკვირდებით კანდიდატებს, რომლებიც დარეგისტრირდებიან და მივიღებთ გადაწყვეტილებას. გუნდში მიმდინარეობს არამხოლოდ კომუნიკაცია, არამედ დისკუსიაც", განაცხადა ბახტაძემ 21 აგვისტოს და დაამატა:

„არაერთხელ გავაკეთე განმარტება ამ საკითხთან დაკავშირებით - „ქართული ოცნების" ფილოსოფია არის საპარლამენტო დემოკრატიის და საპარლამენტო რესპუბლიკის მშენებლობა.

აქედან გამომდინარე, ორივე პოზიციას აქვს თავისი არგუმენტები: ის, რომ ჩვენ გვაქვს კონსტიტუციური უმრავლესობა პარლამენტში, შესაძლოა ჩვენი დემოკრატიული განვითარებისთვის უკეთესი იყოს, რომ საპრეზიდენტო არჩევნებში არ მივიღოთ მონაწილეობა, თუმცა, ამასთან მეორე მხრივ არსებობს მოსაზრება, რომ პარტია აუცილებლად უნდა იყოს წარმოდგენილი თავისი კანდიდატით ამ არჩევნებზე. ჩვენ დავაკვირდებით მოვლენებს და მივიღებთ შესაბამის გადაწყვეტილებას".

სალომე ზურაბიშვილი, რომელიც დამოუკიდებელი კანდიდატის რანგში მის მხარდამჭერებთან შეხვედრებს და ხელმოწერების შეგროვებას განაგრძობს, ამ დრომდე „ქართული ოცნების“ მხარდაჭერის მოლოდინშია.