გერმანიის ფედერაციული რესპუბლიკის საგარეო საქმეთა მინისტრმა ჰაიკო მაასმა განაცხადა, რომ იგი ახალ საგარეო პოლიტიკის სტრატეგიას წარმოადგენს ამერიკის შეერთებულ შტატებთან დაკავშირებით. აღნიშნულის შესახებ „რია ნოვოსტი“ სააგენტო „dpa“-ზე დაყრდნობით იტყობინება.

ახალი სტრატეგიის წარდგენას მაასი 3 ოქტომბერს გეგმავს. „უკვე დიდი ხანია დადგა დრო, გადავაფასოთ ტრანსატლანტიკური პარტნიორობა: გონივრულად, კრიტიკულად და თვითკრიტიკულადაც კი“, განაცხადა მინისტრმა ბერლინში 25 აგვისტოს.

უფრო ადრე, თავის სტატიაში, რომელიც გაზეთ „ Handelsblatt“-ში გამოქვეყნდა, მაასმა (მაღლა ფოტოზე) აღნიშნა, რომ მრავალი წელია, რაც შეერთებული შტატები და გერმანია თანდათან სცილდებიან ერთმანეთს, ხოლო საერთო ინტერესები და ღირებულებები თანდათანობით უჩინარდება. გერმანიის საგარეო საქმეთა მინისტრი აცხადებს, რომ აღმოსავლეთთან ურთიერთობების ნორმალიზების პროცესი ჯერ კიდევ დონალდ ტრამპის ხელისუფლებაში მოსვლამდე დაიწყო და გამოდის იმ სტრატეგიის წინააღმდეგ, რომელიც ევროპას შეერთებულ შტატებში ხელისუფლების შეცვლის დალოდებას სთავაზობს.

ვაშინგტონთან ახალი ურთიერთობების უმთავრეს საფუძვლად მაასი თანამშრომლობის დაბალანსებას მიიჩნევს, ხოლო გერმანული საგარეო პოლიტიკის მთავარ მიზნად ძლიერი და დამოუკიდებელი ევროპის შექმნას ასახელებს. ამასთან, მან აღნიშნა, რომ იქ, სადაც აშშ გადაკვეთს წითელ ხაზებს, გაერთიანებულმა ევროპამ მას საპირწონე წინააღმდეგობა უნდა გაუწიოს.

შეერთებულ შტატებსა და ევროკავშირს შორის ურთიერთობები ვაშინგტონის მიერ ირანის ბირთვული შეთანხმებიდან ცალმხრივი გამოსვლისა და ევროკავშირიდან ფოლადისა და ალუმინის ექსპორტზე ტარიფების დაწესების წინადადების წარმოდგენის ფონზე გამწვავდა. საპასუხოდ, ბრიუსელმა აშშ-იდან ევროკავშირში შემავალ მთელ რიგ ამერიკულ პროდუქტებზე დამატებითი 25%-იანი ტარიფები დააწესა.