ავიაკომპანია „Utair“-ის სამგზავრო თვითმფრინავს, „ბოინგ 737“-ს სოჭში დაფრენის შემდეგ ცეცხლი გაუჩნდა, ევაკუირებულია 160 ადამიანი, დაზიანებები აქვს მიღებული 18 ადამიანს, მათ შორის სამი ბავშვია, იტყობინება „რია ნოვოსტი“ ქვეყნის ჯანდაცვის სამინისტროზე დაყრდნობით.

უფრო ადრე ვრცელდებოდა ინფორმაცია, რომ დაზიანებები ჰქონდა მიღებული 6 მგზავრს, რომელთაგან 4 ჰოსპიტალიზებული იყო.

„სოჭის აეროპორტში დაშვებისას „ბოინგ 737“, რომელიც მოსკოვიდან მოფრინავდა, ასაფრენ-დასაფრენი ბილიკიდან გადავიდა და ცეცხლი გაუჩნდა“, განუცხადეს ახალი ამბების სააგენტოს. ავიაკომპანიის ცნობით, ლაინერს დაზიანებული აქვს ფრთების ნაწილი და მარცხენა ძრავი.

ინციდენტი ადგილობრივი დროით 02:59 საათზე მოხდა. ავიალაინერზე გაჩენილ ცეცხლს ხუთი სახანძრო ბრიგადა აქრობდა. სოჭის აეროპორტის პრესსამსახურის ცნობით, სახანძრო ბრიგადის ერთ-ერთი თანამშრომელი ხანძრის ლიკვიდაციისას დაიღუპა. 

ეს ბოლო 10 დღეში მეორე მსგავსი ინციდენტია. 22 აგვისტოს „Red Wings“-ის თვითმფრინავი „Ту-204“ რომელიც უფადან სოჭში მიფრინავდა და რომლის ბორტზეც 204 მგზავრი იმყოფებოდა, მარცხენა ძრავზე გაჩენილი ცეცხლის გამო, იძულებული გახდა უკან გაბრუნებულიყო.