არასამთავრობო ორგანიზაცია "პოზიცია"-ს აღმასრულებელმა დირექტორმა გურამ ადამაშვილმა დღევანდელი პრეს-კონფერენცია ვერეს ხეობაში მშნებლობების კანონიერების თემას მიუძღვნა.


გამომდინარე იქედან, რომ ეს ადგილი, დედაქალაქის აღნიშნული ცენტრალური ნაწილი, ერთ-ერთ პრესტიჟულ უბნად იყო მიჩნეული და შესაბამისად, მშენებარე ბინებზეც ფასები საკმაოდ მაღალი იყო, ადამაშვილი გამოთქვამს ეჭვს, რომ გამოძიების შედეგად შესაძლოა, საზოგადოება  მსხვილი კორუფციული გარიგებების მომსწრე გახდეს.


ადამაშვილს მიაჩნია, რომ ისეთ სახიფათო ზონაში, როგორიც მდინარე ვერეს ხეობაა, განსაკუთრებული პასუხისმგებლობით უნდა ყოფილიყო კერძო სახლებისა თუ კორპუსების მშნებლობის საკითხებზე გადაწყვეტილებები მიღებული, რადგან მერიის შესაბამის სამსახურებს უნდა ჰქონოდათ ელემენტარულ ენციკლოპედიურ ინფომაციაზე წვდომა, რომ მდინარე ვერეს წვიმიან ამინდებში, პერიოდულად ახასიათებს ადიდება და მის კალაპოტში განსაკუთრებით დიდი ოდენობით წყლის მოცულობამ შეიძლება მოიყაროს თავი, რაც ბუნებრივია, მიმდებარე ტერიტორიისთვის ხიფათის შემცველია.


„პოზიცია“ მიმართავს შესაბამის საგამოძიებო ორგანოებს, დეტალურად შეისწავლონ თბილისში, ვერეს ხეობაში 13 ივნისის ტრაგედიამდე გაცემული სამშენებლო ნებართვების კანონიერების საკითხი. კერძოდ, გამოძიებულ იქნას თითოეულ მშენებლობაზე გაცემული ნებართვის კანონიერება, ასეთის არსებობის შემთხვევაში, რადგანაც არ არის გამორიცხული, წინა ხელისუფლების დროს აღნიშნული ხეობის დაჩქარებული წესით „განაშენიანება“ დაკავშირებული იყოს უნებართვო მშენებლობებთან, კორუფციულ გარიგებებთან და მერიის მაშინდელი მაღალჩინოსნების დანაშეულებრივ ქმედებებთან.


ამასთან, „პოზიცია“ უერთდება საზოგადოების ერთი ნაწილის მოთხოვნას იმასთან დაკავშირებით, რომ დღევანდელი ზოოპარკისა და ვერეს ხეობის მიმდებარე ტერიტორიაზე შეწყდეს ყოველგვარი მშნებლობა და თბილისის ეს ნაწილი მთლიანად რეკრეაციულ ზონად იქცეს.