დიდი ბრიტანეთის პრემიერ მინისტრმა განაცხადა, რომ შემდეგ საპარლამენტო არჩევნებზე იგი არ უხელმძღვანელებს „კონსერვატიულ პარტიას“. ბრიუსელში, ევროკავშირის სამიტზე დასასწრებად და „ბრექსიტის“ შეთანხმებაში ცვლილებების შეტანის საკითხზე ევროკავშირის ლიდერებთან მოლპარაკებების საწარმოებლად ჩასულმა მეიმ თქვა, რომ პარტია ამჯობინებს „იმ არჩევნებზე სხვა ლიდერით წარსდგეს“.

აღნიშნული განცხადებით მან დაადასტურა „კონსერვატორი“ დეპუტატების მიერ ოთხშაბათს გაკეთებული კომენტარების ნამდვილობა, რომ 2022 წლის არჩევნებამდე იგი პოსტს დატოვებდა. „ტორების“ დეპუტატებმა თქვეს, რომ ამის შესახებ პრემიერ მინისტრმა მათ ემოციურ შეხვედრაზე, ნდობის კენჭისყრის გამართვამდე სულ ცოტა ხნით ადრე უთხრა. მეიმ კი ამის თაობაზე პირველი კომენტარი მედიასთან ბრიუსელში ახლახან გააკეთა.

მეიმ ნდობის კენჭისყრაში გამარჯვება მოიპოვა - 200 ხმით 117-ის წინააღმდეგ, მაგრამ პირობა დადო, რომ მოუსმენს „ტორების“ დეპუტატთა იმ 37%-ის წუხილებს, რომელთაც მას ხმა არ მისცეს.

დიდ ბრიტანეთში მომავალი საპარლამენტო არჩევნები 2022 წლისთვის არის დაგეგმილი.

BBC-ის ცნობით, მეიმ განაცხადა: „მე მთელი ჩემი გულით ვთქვი, რომ დიდად მოხარული ვიქნებოდი, რომ შემძლებოდა მეხელმძღვანელა „კონსერვატიული პარტიისთვის“ მომავალ საპარლამენტო არჩევნებზე, მაგრამ ვფიქრობ, რომ მართებულია პარტიის შეგრძნება, რომ მათ ამჯობინონ ამ არჩევნებზე სხვა ლიდერით წავიდნენ“.

შეკითხვაზე, გადადგება თუ არა „ბრექსიტის“ შემდეგ, მან პირდაპირი პასუხი არ გასცა და თავი შეიკავა თარიღების დასახლებისაგან, მაგრამ აღნიშნა: „ის, რაშიც მკაფიოდ ვარ ჩამოყალიბებული, ეს არის ის, რომ შემდეგი საპარლამენტო არჩევნები 2022 წელსაა და ვფიქრობ, მართებულია, რომ პარტიის ხვა ლიდერი გაგვიძღვეს ამ საპარლამენტო არჩევნებზე“.