დაბა ლენტეხში, საპატრიარქოს ბალანსზე არსებულ შენობა-ნაგებობაში, სადაც იძულებით გადაადგილებული პირები და ეკომიგრანტები ცხოვრობენ, ხანძარი გაჩნდა. როგორც ლენტეხის მუნიციპალიტეტის მერმა, ბადრი ლიპარტელიანმა GUARDIAN.GE-ს განუცხადა, ხანძრის შედეგად არავინ დაშავებულა, თუმცა ცეცხლმა, დაახლოებით, 200-300 კვ. მეტრი საცხოვრებელი ფართი გაანადგურა.

ლიპარტელიანის თქმითვე, სახანძრო-სამაშველო ჯგუფების დროული რეაგირების შედეგად, ხანძარი უკვე ლიკვიდირებულია და ცეცხლის გავრცელების საშიშროება აღარ არსებობს.

მერთან ერთად, შემთხვევის ადგილზე იმყოფება რაჭა-ლეჩხუმ-ქვემო სვანეთის სახელმწიფო რწმუნებული არჩილ ჯაფარიძე, რომელიც ადგილობრივებს ხვდება.

„მსხვერპლი არ არის, არც დაშავებულია ვინმე. სახანძრო-სამაშველო სამსახური დროულად მოვიდა, დაგვეხმარნენ ცაგერიდანაც და ხანძარი ამ დროისთვის ლიკვიდირებულია. ცეცხლის გავრცელების არანაირი საშიშროება არ არსებობს. შემთხვვის ადგილზე ვიმყოფებოდი მე, ჩამობრძანებულია სახელმწიფო რწმუნებული და მისი მოადგილე.

შენობაში, დაახლოებით, 10-12 ოჯახი ცხოვრობს. ამ ეტაპზე, 2-3 ოჯახი, ვისი კუთვნილი ბინებიც დაიწვა, ადგილზე არ იმყოფებოდა. დაიწვა, დაახლოებით, 200-300 კვ. მეტრი ფართი. ბინა დაეწვა ძირითადად 2 ოჯახს, თუმცა, ისინი როგორც აღვნიშნე, აქ არ იმყოფებიან. რაც შეეხება მესამე ბინას, რომელიც მცირედ დაზიანდა, ერთი მცხოვრები ჰყავს და რჩება ბინაშივე. დასაბინავებელი არავინ გვყავს ამაღამ. აღდგენაზე, ალბათ, ის იზრუნებს, ვის ბალანსზეცაა შენობა.

რაც შეეხება ხანძრის გამომწვევ მიზეზს, ამაზე ბუნებრივია, მე საუბარი არ შემიძლია", უთხრა GUARDIAN.GE-ს ბადრი ლიპარტელიანმა.