შეერთებული შტატების პრეზიდენტმა დონალდ ტრამპმა განაცხადა, რომ ქალს, რომელმაც დატოვა აშშ იმისათვის, რომ გამხდარიყო „ისლამური სახელმწიფოს“ დაჯგუფების პროპაგანდისტი, ამერიკაში უკან დაბრუნების საშუალება არ მიეცემა.

„თვითერზე“ გავრცელებულ განცხადებაში პრეზიდენტმა აღნიშნა, რომ მან ინსტრუქცია მისცა სახელმწიფო მდივანს, მაიკ პომპეოს „ჰოდა მუტანას ქვეყანაში უკან დაბრუნების ნება არ დართოს“.

უფრო ადრე პომპეო ამტკიცებდა, რომ 24 წლის მუტანა არ იყო აშშ-ის მოქალაქე და არ უნდა მისცემოდა მას უკან დაბრუნების საშუალება.

მიუხედავად ამისა, ახალგაზრდა ქალის ოჯახმა და მისმა ადვოკატმა განაცხადეს, რომ მას აშშ-ის მოქალაქეობა გააჩნია.

მუტანა, რომელიც ალაბამაში გაიზარდა, 20 წლის იყო, როდესაც სირიაში „ისლამური სახელმწიფოს“ რიგებში გაერთიანების მიზნით გაემგზავრა. მან თავის ოჯახს უთხრა, რომ თურქეთში, უნივერსიტეტთან დაკავშირებულ ღონისძიებაზე მიდიოდა.

აღნიშნული საქმე მსგავსია დიდ ბრიტანეთში დაბადებული მოზარდისა, შამიმა ბეგუმის, რომელსაც ბრიტანული მოქალაქეობა ჩამოერთვა. ბეგუმი ლონდონიდან 2015 წელს გაიქცა იმისათვის, რომ „ისლამური სახელმწიფოს“ რიგებში გაწევრიანებულიყო, მაგრამ ახლა აცხადებს, რომ დიდ ბრიტანეთში დაბრუნება სურს.

პრეზიდენტმა ტრამპმა დიდ ბრიტანეთს და სხვა ევროპულ ქვეყნებს ახლახან უთხრა, რომ „ისლამური სახელმწიფოს“ მებრძოლები, რომელიც დაჯგუფების წინააღმდეგ საბოლოო ბრძოლებისას იქნებიან დატყვევებულნი, უკან წაიყვანონ და გაასამართლონ.

მუტანას ოჯახის ადვოკატმა, ჰასან შიბლიმ განაცხადა, რომ „სრულიად აბსურდულია“ ის, რომ ტრამპი ერთი მხრივ მოუწოდებდეს ევროპულ სახელმწიფოებს უკან წაიყვანონ თავიანთი მოქალაქეები და მეორე მხრივ „ახლა ცდილობს ითამაშოს, როდესაც საქმე ეხება ამერიკის მოქალაქეებს“.

„ტრამპის ადმინისტრაცია განაგრძობს თავის მცდელობებს არაკანონიერად ჩამოართვას მოქალაქეობა თავის მოქალაქეებს. ჰოდა მუტანას მოქმედი ამერიკული პასპორტი ჰქონდა და არის აშშ-ის მოქალაქე. იგი დაიბადა ნიუ ჯერსიში, ჰაკენსაკში, 1994 წლის ოქტომბერში, ერთი თვის შემდეგ, რაც მამამისმა დიპლომატიური საქმიანობა შეწყვიტა“, უთხრა ადვოკატმა „ABC News“-სს.

მანვე აღნიშნა, რომ მუტანა ნანობს თავის საქციელს და სურს უკან დაბრუნდეს შეერთებულ შტატებში.