წყალტუბოს მთავარ ბიბლიოთეკას პროექტის - „ცოცხალი წიგნები“ ფარგლებში ქართველი პოეტები და მწერლები ესტუმრნენ.

შეხვედრა საბიბლიოთეკო ქსელის მენეჯერმა სულიკო სვანიძემ გახსნა. „სიმღერით მინდა მე წამოწყება, რომ გაიშალოს გამოცოცხლება“ - დიდი გალაკტიონის ეს სიტყვები ვფიქრობ მთლიანად გამოხატავს დღევანდელი ღონისძიების მიზანსა და ზოგადად ამ პროექტის დანიშნულებას. სასიხარულოა, რომ დღეს ჩვენი სტუმრები არიან ის ადამიანები, რომლებმაც კარგად იციან ქართული სიტყვის ძალა და მადლი, რაც წყალტუბოს ლიტერატურის მოყვარული საზოგადოებისთვის ნამდვილი დღესასწაულია“, აღნიშნა სულიკო სავანიძემ.

წყალტუბოში ჩასული პოეტები და მწერლები საზოგადოებას მწერალმა ნინია სადღობელაშვილმა წარუდგინა. პოეტმა მანანა ჩიტიშვილმა, პოეტმა და მთარგმნელმა გიორგი ლობჟანიძემ, მწერალმა ბექა ქურხულმა, პოეტმა გიორგი არაბულმა და საბავშვო მწერალმა ვასო გულეულმა თავიანთი შემოქმედებიდან რამდენიმე ლექსი და პროზაული ნაწარმოები წაიკითხეს.

შეხვედრას წყალტუბოს მუნიციპალიტეტის საკრებულოს თავმჯდომარის მოვალეობის შემსრულებელი პაატა ახალაძე ესწრებოდა, რომელმაც თავისი შემოქმედებიდან რამდენიმე ლექსი წაიკითხა და პროექტის მონაწილეებს მადლობა გადაუხადა.

„ცოცხალი წიგნები“ საქართველოს კულტურისა და ძეგლთა დაცვის სამინისტროს მასშტაბური ლიტერატურულ-საგანმანათლებლო პროექტია, რომელიც უკვე 5 წელია თანამედროვე ქართული ლიტერატურის პოპულარიზაციას, ავტორებისა და მკითხველების გაცნობას ემსახურება, რაც წიგნის მოყვარული საზოგადოებისთვის ყველაზე მნიშვნელოვანი და აუცილებელია.

ინფორმაციას წყალტუბოს მერიის პრესსამსახური ავრცელებს.