დიდი ბრიტანეთის „კონსერვატიული პარტიის“ თავმჯდომარის პოსტზე წარდგენილ კანდიდატებს შორის, ფარული კენჭისყრისას „ტორების“ დეპუტატთა ყველაზე მეტი მხარდაჭერა ყოფილმა საგარეო საქმეთა მინისტრმა და ლონდონის ყოფილმა მერმა, ბორის ჯონსონმა მოიპოვა. მან 114 ხმა მიიღო, გაცილებით მეტი, ვიდრე მოქმედმა საგარეო საქმეთა მინისტრმა და ყველაზე მთავარმა კონკურენტმა, ჯერემი ჰანტმა, რომელიც 43 ხმით მეორე ადგილზე გავიდა. გარემოს დაცვის მინისტრი მაიკ გოვი კი მესამე ადგილზეა - 37 ხმით. 10-დან სამი კანდიდატი - მარკ ჰარპერი, ანდრეა ლიდსომი და ისტერ მაკვეი საერთოდ გამოეთიშნენ პროცესს, რის გამოც მომავალ კვირას უკვე 7 კანდიდატი განაგრძობს მეორე და შემდგომ რაუნდებში პარტიის ლიდერობისათვის და შესაბამისად, პრემიერ მინისტრობისათვის ბრძოლას.

დეპუტატების მიერ კენჭისყრის საბოლოო პროცესის გამართვის შემდეგ დარჩენილი ორი კანდიდატის ბედს კი საყოველთაო კენჭისყრა გადაწყვეტს, რომელშიც მონაწილეობას უკვე „კონსერვატიული პარტიის“ წევრები მიიღებენ - 100 000-ზე მეტი ადამიანი. „ბრექსიტის“ შეთანხმების თემთა პალატაში რატიფიცირების არაერთხელ ჩავარდნის შემდეგ „კონსერვატიული პარტიის“ თავმჯდომარის პოსტიდან წასული ტერეზა მეის შემცვლელს, სავარაუდოდ 22 ივლისს გამოაცხადებენ.

ჯონსონმა, ყოფილმა საგარეო მდივანმა, რომელიც მანამდე ლონდონის მერის თანამდებობაზე 8 წელი მსახურობდა, თქვა, რომ იგი „აღფრთოვანებული“ იყო გამარჯვებით, მაგრამ გამაფრთხილებლად განაცხადა, რომ მის კამპანიას ჯერ კიდევ „გრძელი გზა აქვს გასავლელი“.

პირველ რაუნდში 313-მა „კონსერვატორმა“ დეპუტატმა მისცა ხმა, მათ შორის ტერეზა მეიმ, რომელმაც თავი შეიკავა იმის გამჟღავნებისაგან, თუ ვის დაუჭირა მან მხარი.

„კონსერვატორი“ დეპუტატების მონაწილეობით შემდეგი კენჭისყრები 18, 19 და 20 ივნისს არის დაგეგმილი და უკვე ორი კანდიდატის დარჩენის შემდეგ, 22 ივნისიდან „კონსერვატიული პარტიის“ ფართო შემადგენლობა გადაწყვეტს თუ ვინ იქნება პარტიის მომავალი ლიდერი და შესაბამისად, მომავალი პრემიერ მინისტრი. მოელიან, რომ გამარჯვებული 4 კვირის მოგვიანებით, 22 ივლისს გამოცხადდება.