ისრაელის პრემიერ მინისტრის, ბენიამინ ნეთანიაჰუს ცოლმა აღიარა, რომ ბოროტად გამოიყენა სახელმწიფო თანხები და ახლა 15,000 აშშ დოლარი უნდა გადაიხადოს, იტყობინება BBC.

სარა ნეთანიაჰუს ბრალი დასდეს 99,300 აშშ დოლარის რეზიდენციის გარეთ საკვების მომსახურებისთვის დახარჯვაში. იგი თავს იმით იმართლებდა, რომ პრემიერ მინისტრის რეზიდენციაში მზარეულები არ იყვნენ ხელმისაწვდომი, რაც ტყუილი აღმოჩნდა.

მას ბრალი გასულ წელს თაღლითობისა და ნდობის ბოროტად გამოყენებაში დასდეს.

მისმა ადვოკატმა განაცხადა, რომ აღნიშნულ საქმეს არაფერი აქვს საერთო სარა ნეთანიაჰუსთან და ეს მისი ქმრის ძალაუფლებიდან ჩამოცილების მცდელობაა.

განსასჯელის მიერ საკუთარი დანაშაულის აღიარების შესახებ მხარეებს შორის გარიგების საფუძველზე ქალბატონი ნეთანიაჰუ სახელმწიფოს 12,490 აშშ დოლარს დაუბრუნებს და ასევე 2,777 აშშ დოლარს ჯარიმის სახით გადაიხდის.

პროკურორმა ერეც პადანმა განაცხადა, რომ ბრალდების მხარე „მნიშვნელოვან დათმობებზე“ წავიდა, რამაც მხარეებს შორის „დაბალანსებული და მართებული შეთანხმება“ განაპირობა. მან აღნიშნა, რომ ამ კომპრომისმა სასამართლო 80 მოწმის გამოძახებისა და დაკითხვისაგან იხსნა.

„პროკურატურას ესმის, რომ აღნიშნულ თანხასა და სისხლის სამართლის დანაშაულს შორის სრული თანაფარდობა არ არის, თუმცა კანონიერი სამართალწარმოების ფარგლებში, სრული თანაფარდობა არ არის სავალდებულო“, განაცხადა საქმის პროკურორმა.

გასულ წელს, ქალბატონი ნეთანიაჰუს ადვოკატები ამტკიცებდნენ, რომ მან არ იცოდა გარეთ კვების პროცედურები და საჭმელების შეკვეთას ოჯახის მენეჯერი ახორციელებდა.

ბრალდბებების საპასუხოდ ბენიამინ ნეთანიაჰუმ განაცხადა: „სარა ნეთანიაჰუ ძლიერი და პატივსაცემი ქალია და მის ქმედებებში არასდროს ყოფილა რაიმე დანაშაული“.

2016 წელს, სასამართლომ 47,000 აშშ დოლარის გადახდა დააკისრა ქალბატონ ნეთანიაჰუს საოჯახო საქმეებში დამხმარე მამაკაცისთვის, რომელმაც პრემიერ მინისტრის მეუღლეს სამუშაო ადგილზე შეურაცხყოფისთვის უჩივლა. სასამართლომ დააკმაყოფილა მენი ნაფტალის სარჩელი, რომ მის მიმართ შეურაცხყოფას და სიტყვიერ დამცირებას ჰქონდა ადგილი.

თავის მრივ, პრემიერ მინისტრ ნეთანიაჰუსაც ცალკე სასამართლო პროცესი ელოდება. ისრაელის გენერალურმა პროკურორმა მას თებერვალში შეტყობინება გაუგზავნა და ამცნო, რომ მის მიმართ სამი მუხლით არის საქმე აღძრული და ბრალი ქრთამის აღებაში, თაღლითობასა და ნდობის ბოროტად გამოყენებაში ედება.

აღნიშნულთან დაკავშირებით სასამართლო პროცესზე საბოლოო მოსმენა ჯერ არ გამართულა და ბოლო განხილვა, რომელზეც ნეთანიაჰუს და მის ადვოკატებს ბრალდების წინააღმდეგ თავიანთი მტკიცებულებების წარდგენის საშუალება ექნებათ, მიმდინარე წლის ოქტომბრისთვისაა დაგეგმილი.

ნეთანიაჰუმ განაცხადა, რომ მას არავითარი კანონდარღვევა არ ჩაუდენია და იგი კუდიანებზე პოლიტიკური ნადირობის მსხვერპლია.