„ინფლაციური პროცესების განვითარების შემთხვევაში ადეკვატურ ზომებს მივიღებთ, რაც მონეტარული პოლიტიკის გადაწყვეტილებებში აისახება“, - ამის შესახებ ეროვნული ბანკის პრეზიდენტმა კობა გვენეტაძემ განაცხადა.

როგორც მან აღნიშნა, იმ შემთხვევაში თუ ინფლაციაზე წნეხი იქნება, ეროვნული ბანკი შესაბამის ზომებს მიიღებს.

„დავაკვირდებით და თუ იქნება ინფლაციაზე წნეხი, მივიღებთ ადეკვატურ ზომებს იმ სიტუაციიდან გამომდინარე, რაც გვექნება. მოგეხსენებათ, ინფლაციის თარგეთირება გვაქვს ქვეყანაში და გაცხადებული მაჩვენებელი არის სამი პროცენტი. თუმცა, როგორც არაერთხელ აღვნიშნეთ, ეს არ არის ლიმიტი და შესაძლებელია, ინფლაცია იყოს სამ პროცენტზე ზემოთ ან ქვემოთ. რა თქმა უნდა, ეგზოგენურმა ფაქტორებმა შეიძლება, იქონიოს გავლენა და ამ შემთხვევაში, ზუსტად ეს არის ეგზოგენური და არა მონეტარული ფაქტორი. თუ შევნიშნეთ, რომ ინფლაციური პროცესები უფრო ვითარდება, ამას აუცილებლად ავსახავთ მონეტარული პოლიტიკის გადაწყვეტილებებში“, – განაცხადა გვენეტაძემ.

მაისში წლიურმა ინფლაციამ საქართველოში 4.7 პროცენტი შეადგინა, ივნისის მაჩვენებელი კი, ხვალ გახდება ცნობილი.

როგორც გვენეტაძემ განაცხადა, ტურიზმის სექტორის დანაკლისმა ეროვნულ ვალუტაზე დიდი წნეხი არ უნდა გამოიწვიოს, რადგან მიმდინარე ანგარიშის დეფიციტი გაუმჯობესდა.

გვენეტაძე ვარაუდობს, რომ ტურისტული სანქციების გავლენა ეკონომიკაზე 200-300 მილიონი აშშ დოლარი იქნება, თუმცა გასულ წელთან შედარებით, მიმდინარე ანგარიშის დეფიციტი მაინც გაუმჯობესდება.

მან აღნიშნა, რომ საქართველოში მოქმედებს მცურავი გაცვლითი კურსის რეჟიმი და კურსის პროგნოზირება შეუძლებელია.

„ეს მოქნილი სისტემაა, რომელიც საშუალებას აძლევს კურსს, გაითვალისწინოს ყველა მოლოდინი, რომელიც ცნობილია და ხელმისაწვდომია ეკონომიკური აგენტებისთვის. ინფორმაცია, რომ შესაძლებელია გარკვეული რაოდენობის ტურისტები აღარ ჩამოვიდნენ ქვეყანაში, რა თქმა უნდა, აისახა მოლოდინებზე და გაჩნდა მოლოდინი, რომ ის საექსპორტო სერვისების შემოსავლები, რომელიც ქვეყანაში უნდა ყოფილიყო, იქნება ნაკლები. ზუსტად ამ დროს ასრულებს მცურავი გაცვლითი კურსი, როგორც ავტომატური სტაბილიზატორი იმ ფუნქციას, რაც ამ შემთხვევაში, უნდა შეასრულოს. მნიშვნელოვანია აღვნიშნოთ, რომ ამ შემთხვევაში ის კორექტირება, რომელიც ხორციელდება ეკონომიკაში, ყველაზე ნაკლები დანახარჯებით გამოიყვანს ასეთი სიტუაციებიდან ქვეყანას. დღესდღეობით რთულია იმის შეფასება, რა გავლენა ექნება ამას, რადგან ჯერ კიდევ მიმდინარე პროცესია. შეიძლება ითქვას, რომ პირველი კვარტლის შედეგების მიხედვით, ვგულისხმობ მიმდინარე ანგარიშის დეფიციტს, ვფიქრობ, წნეხი დიდი არ უნდა იყოს“, – განაცხადა გვენეტაძემ და დაამატა, რომ ეროვნული ბანკი უცხოური ვალუტის შესყიდვას იქიდან გამომდინარე ახორციელებდა, რომ ქვეყანას არაადეკვატური რეზერვები ჰქონდა.

„აუცილებელი იყო რეზერვების დაგროვება. ყოველი მომენტი, რომელიც საშუალებას გვაძლევდა და გვაძლევს, რომ შევავსოთ საერთაშორისო რეზერვები, უნდა გამოვიყენოთ. ეს ძალიან მნიშვნელოვანი ელემენტია, რომ საერთაშორისო ინვესტორებმა საქართველო განიხილონ საიმედო ქვეყნად. საერთაშორისო სავალუტო ფონდის მიერ მხარდაჭერილი პროგრამის მეოთხე მიმოხილვის პრესრელიზში ცალსახად არის აღნიშნული, რომ ეროვნული ბანკის ჩარევები საერთაშორისო რეზერვების დაგროვების მიმართულებით არის აბსოლუტურად სწორი და გამართლებული. ეროვნული ბანკის ასეთი ინტერვენციები ლარის კურსზე გავლენას არ ახდენს“, – აღნიშნა კობა გვენეტაძემ.