გადაუღებელი წვიმის შედეგად ადიდებული მდინარე მესტიაჭალა საფრთხეს უქმნიდა დაბა მესტიაში, ლალაიდის დასახლებას (ე.წ. „ლალაიდის“ ხიდის მიმდებარე ტერიტორია).

როგორც მესტიის მერიაში აცხადებენ, ჩატარდა კალაპოტის განტვირთვის სამუშაოები, რის შედეგადაც მოხერხდა მდინარის კალაპოტში დაბრუნება.

მესტიის მერიის ინფორმაციით, ამ ეტაპზე მოსახლეობას საფრთხე არ ემუქრება.

მესტიის მუნიციპალიტეტის მერია მადლობას უხდის, შპს „ლემს“, სპეციალური ტექნიკით გაწეული დახმარებისთვის.

დაბა მესტიაში რამდენიმედღიანი გადაუღებელი წვიმის შედეგად, ლეხზირის ხეობაში, დიდი რაოდენობის ნატანი მასალის მდინარე მესტიაჭალაში ჩადინებამ მდინარის ადიდება და კალაპოტიდან გადმოსვლა განაპირობა. აღნიშნულიდან გამომდინარე ჭალაადის მყინვარის მიმდებარე ტერიტორია დაფარულია ნატანი მასალით, განადგურებულია რამდენიმე ავტომანქანა, საავტომობილო ხიდი და ადგილზე არსებული ინფრასტრუქტურა.

„ასევე დაზიანებულია „წრნიაშიდან“ წყლის მიმღები ცენტრალური მაგისტრალის ორი მილი, რომლებიც ამარაგებენ დაბა მესტიას სასმელი წყლით, ამ დროისთვის დაბა მესტიის მოსახლეობის ნახევარზე მეტს სასმელი წყალი არ მიეწოდება. ჯერჯერობით, გაერთიანებული წყალმომარაგების კომპანიის წარმომადგენლები უსაფრთხოების ნორმებიდან გამომდინარე დაზიანების ადგილზე მისვლას ვერ ახერხებენ.

ამ წუთებში ადგილზე იმყოფებიან მხოლოდ სასაზღვრო და სამაშველო სამსახურის წარმომადგენლები.

ზარალის ზუსტი ოდენობა უცნობია. საბედნიეროდ, მსხვერპლი არ არის“, ნათქვამია მესტიის მერიის ინფორმაციაში.