ამა წლის ზაფხულში მონღოლეთში სანადიროდ წასულმა ამერიკის შეერთებული შტატების პრეზიდენტის ვაჟმა, დონალდ ტრამპ უმცროსმა გადაშენების პირას მყოფი იშვიათი სახეობის ჯიხვი მოკლა. როგორც ბრიტანული „გარდიანი“ „ProPublica“-ზე დაყრდნობით წერს, ნადირის მოკვლის ნებართვა მას შემდეგ გაიცა, რაც ტრამპი ქვეყნის პრეზიდენტს შეხვდა.

ნადირობისას ტრამპს თან ახლდა დაცვა, როგორც შეერთებული შტატებიდან, ისე მონღოლეთიდან. დიდრქებიანი არგალის ჯიხვი მონღოლეთში ეროვნულ სიმდიდრედაა მიჩნეული და მისი მოკვლის ნებართვა „გაუმჭვირვალე ნებართვის სისტემის მიერ კონტროლდება, რაც ექსპერტების თქმით, უმეტესწილად დაფუძნებულია ფულზე, კავშირებსა და პოლიტიკაზე“.

ჯიხვზე ნადირობამდე ტრამპი პრეზიდენტ ხალთმააგიინ ბატულგას შეხვდა, სადაც გამოცემის თანახმად, აშშ-ის პრეზიდენტის ვაჟისთვის იშვიათ ცხოველზე ნადირობისთვის სპეციალური ნებართვის საკითხი განიხილეს.

„ProPublica“-ს ცნობით, უმცროსმა ტრმპმა არგალის ჯიხვი ღამით, ლაზერული ხედვის ცეცხლსასროლი იარაღის გამოყენებით მოკლა. მან ჯიხვთან ერთად წითელი ირემიც მოკლა, რომელიც ასევე ნებართვას საჭიროებს.

(აღნიშნულ ფოტოზე დონალდ ტრამპ უმცროსი ზიმბაბვეში ნადირობისას).

იმისათვის, რომ განადგურების პირას მყოფი ცხოველების სიაში შეყვანილი ნანადირევის შეერთებულ შტატებში იმპორტირება მოახდინო, ამერიკელმა მონადირემ უნდა აჩვენოს, რომ მის მიერ ცხოველის მოკვლა ზოგადად სასარგებლოა ამ სახეობებისთვის.

2017 წელს ტრამპის ადმინისტრაცია ობამას ეპოქის ამგვარი შეზღუდვების წინააღმდეგ გამოვიდა, სანამ აღადგენდა სრულ აკრძალვას. ამის შემდეგ კი სასამართლომ მიიღო დადგენილება, რომ ეს გადაწყვეტილება არასწორად იქნა მიღებული და ნება დართო, რომ იმპორტი გაგრძელებულიყო.

თავად პრეზიდენტმა ტრამპმა ამგვარ ნადირობას „საშინელი სანახაობა“ უწოდა, მიუხედავად იმისა, რომ მისი ორი ვაჟი გაუმაძღარი მონადირეა.