20­­­-25 ნოემბერს საქართველოს განათლების, მეცნიერების, კულტურისა და სპორტის სამინისტროს მხარდაჭერით, რიგით მეექვსე „თბილისის ბაროკო ფესტივალი“ დისტანციურ ფორმატში ჩატარდება.

კორონავირუსის პანდემიის პრევენციის მიზნით შემუშავებული რეგულაციების გათვალისწინებით, ფესტივალი წელს განსხვავებული ფორმატით გაიმართება და მას მაყურებელი არ დაესწრება. დაგეგმილი კონცერტების მოსმენა შესაძლებელი იქნება ,,თბილისის ბაროკო ფესტივალის“ ოფიციალურ Facebook გვერდზე და ტელეარხზე „სილქ უნივერსალი“.

20 ნოემბერს ფესტივალს, „საქართველოს სინფონიეტასთან“ ერთად, გახსნის ქართველი პუბლიკისთვის უკვე კარგად ცნობილი, მსოფლიოში აღიარებული მუსიკოსი, ფაგოტისტი სერჯო აცოლინი. შესრულდება ალბინონის, ვივალდის, ჯემინიანისა და კატანეოს ნაწარმოებები.

ფესტივალის ფარგლებში აგრეთვე დაგეგმილია ონლაინ ლექციები; მსმენელს საშუალება ექნება, მოისმინოს პროფესორების ნოდარ ლადარიასა და დავით გიგინეიშვილის, ასევე, მხატვარ გია ბუღაძის საინტერესო საუბრები ბაროკოს ეპოქაში სხვადასხვა მიმდინარე პროცესის შესახებ.

22 ნოემბერს გიორგი ალექსიძის სახელობის „თბილისის თანამედროვე ბალეტი“ წარმოადგენს მარიამ ალექსიძის ონლაინ შემეცნებით ვიდეო-წარმოდგენას - „გიორგი ალექსიძის ნეობაროკო“, სადაც მოგვითხრობს გიორგი ალექსიძისეულ ცეკვის სტილზე, ხოლო დასი წარმოადგენს გიორგი ალექსიძის მიერ ბაროკოს პერიოდის კომპოზიტორების მუსიკაზე დადგმულ კომპოზიციებს.

ფესტივალი 25 ნოემბერს დასრულდება. თბილისის სახელმწიფო კამერული ორკესტრი მსმენელს შესთავაზებს კონცერტს სახელწოდებით „იტალიური კონცერტები“, სადაც სოლისტების რანგში ორკესტრის მუსიკოსები თავად წარდგებიან მსმენელის წინაშე და ვივალდის, კორელის, მარჩელოსა და ჰენდელის ნაწარმოებებს შეასრულებენ.

„თბილისის ბაროკო ფესტივალის“ მხარდამჭერები არიან: საქართველოს განათლების, მეცნიერების, კულტურისა და სპორტის სამინისტრო, ქ. თბილისის მერია და იტალიის საელჩო საქართველოში. ფესტივალის ორგანიზატორია თბილისის სახელმწიფო კამერული ორკესტრი.