GUARDIAN.GE - ამერიკის შეერთებული შტატების ყოფილმა პრეზიდენტმა, დონალდ ტრამპმა საინფორმაციო ვებგვერდზე, Just The News-ზე გამოქვეყნებულ ვიდეოში მოუწოდა რუსეთის პრეზიდენტს, ვლადიმერ პუტინს, გაავრცელოს დამაზარალებელი ინფორმაცია, რომელიც მას ბაიდენის ოჯახზე გააჩნია. ინტერვიუში ტრამპმა წამოაყენა დაუმტკიცებელი პრეტენზია რუსეთში ჰანტერ ბაიდენის საქმიანი გარიგებების შესახებ და სთხოვა პუტინს, გამოაქვეყნოს ნებისმიერი ინფორმაცია, რაც შეიძლება გააჩნდეს ამ სიტუაციის შესახებ.

„რატომ მისცა მოსკოვის მერის ცოლმა ბაიდენებს, ორივე მათგანს, 3,5 მილიონი დოლარი, ეს დიდი ფულია. მან 3,5 მილიონი დოლარი მისცა. ვფიქრობ, პუტინს ეცოდინება პასუხი“, - თქვა ტრამპმა ჰანტერ ბაიდენის რუს ოლიგარქებთან პოტენციურ გარიგებებზე კომენტირებისას. „ვფიქრობ, მან უნდა გაავრცელოს ის. მიმაჩნია, რომ ჩვენ უნდა ვიცოდეთ ეს პასუხი“.

ამ დროისთვის არ არის ცნობილი არსებობს თუ არა რაიმე მასალა ჰანტერ ბაიდენზე, ან აქვს თუ არა მასზე წვდომა კრემლს.

ჰანტერ ბაიდენს სოლიდურად უხდიდნენ საკონსულტაციო სამუშაოსთვის, რომელსაც ის უცხო ქვეყნებში, მათ შორის უკრაინასა და ჩინეთში ეწეოდა იმ დროს, როდესაც მამამისი ჯოზეფ ბაიდენი ვიცე-პრეზიდენტი იყო.

აშშ-ის იუსტიციის დეპარტამენტში მიმდინარეობს სისხლის სამართლის გამოძიება ამ გარიგებებისა და პოტენციური ფინანსური დანაშაულების შესახებ, მაგრამ, როგორც CNN იტყობინება, არც ერთი მტკიცებულება არ დადებულა, რომელიც დაადასტურებდა ტრამპის განცხადებებს, რომ ბაიდენები ჩართულნი იყვნენ კორუფციაში ან ახდენდნენ გავლენას აშშ-ის პოლიტიკაზე პირადი სარგებლობისთვის და პრეზიდენტი არ ყოფილა ჩართული გამოძიებაში. ჰანტერ ბაიდენმა უარყო, რომ რაიმე დანაშაული აქვს ჩადენილი და განაცხადა, რომ მას გაამართლებენ, როდესაც სისხლის სამართლის გამოძიება დასრულდება.

Just The News-ის ცნობით, ნაფიცი მსაჯულები დელავერში იძიებენ ჰანტერ ბიდენის საქმიან ურთიერთობებს შესაძლო საგადასახადო დარღვევებზე, უცხოური ლობირების საკითხებსა და ფულის გათეთრებაზე. ჰანტერ ბაიდენმა აღიარა, რომ გამოძიება მიმდინარეობს, მაგრამ თქვა, რომ დანაშაული არ ჩაუდენია.

ტრამპმა ინტერვიუში განაცხადა, რომ მას ასევე სურს მეტი იცოდეს ჰანტერ ბაიდენის ურთიერთობის შესახებ უკრაინელ ოლიგარქ ნიკოლაი ზლოჩევსკისთან, გაზის კომპანიის Burisma Holdings-ის მფლობელთან, რომელმაც 2014 წელს ჯოზეფ ბაიდენის შვილი მის საბჭოში დაიქირავა და მას წელიწადში ასობით ათას დოლარს უხდიდა.

როგორც Just The News-ი წერს, იმ დროს სახელმწიფო დეპარტამენტი Burisma Holdings-ს კორუმპირებულ კომპანიად მიიჩნევდა, რომელიც ქრთამს აძლევდა უკრაინელ ჩინოვნიკებს და ჰანტერ ბაიდენის ურთიერთობას კომპანიასთან განიხილავდა, როგორც ინტერესთა კონფლიქტს, რადგან მამამისი, მაშინდელი ვიცე-პრეზიდენტი ჯოზეფ ბაიდენი, აშშ-უკრაინის პოლიტიკას უწევდა ზედამხედველობას.

CNN ტრამპის ინტერვიუს შესახებ გამოქვეყნებულ სტატიაში წერს, რომ 2019 წელს ტრამპმა ზეწოლა მოახდინა უკრაინის პრეზიდენტ ვოლოდიმირ ზელენსკიზე, რათა დაეწყო სავარაუდო კორუფციული გამოძიება მაშინდელი საპრეზიდენტო კანდიდატის, ჯო ბაიდენის წინააღმდეგ და სქემის ფარგლებში შეაჩერა აშშ-ის სამხედრო დახმარება, თითქმის 400 მილიონი აშშ დოლარი. ეს ინციდენტი ტრამპის პირველი იმპიჩმენტის საკითხის დაყენების საფუძველი გახდა.

ვიდეო, სადაც ტრამპი პუტინს მოუწოდებს ბაიდენების ოჯახის მაკოპრომიტირებელი მასალა გაავრცელოს, ტრამპის მხარდამჭერი ჟურნალისტის, ჯონ სოლომონის მიერ  დაფუძნებულ ვებგვერდზე არის გამოქვეყნებული. მან CNN-ს განუცხადა, რომ ინტერვიუ ორშაბათს, ფლორიდაში, ტრამპის მარ-ა-ლაგოს რეზიდენციაშია ჩაწერილი.