GUARDIAN.GE - ვარდო შაინიძე აჭარიდან სამცხე-ჯავახეთში, ახალქალაქის მუნიციპალიტეტის სოფელ აზმანაში 1990-იანი წლების დასაწყისში, სრულიად ახალგაზრდა, ოჯახთან და აჭარის ავტონომიური რესპუბლიკის სხვადასხვა რაიონის მკვიდრ თავის თანამემამულეებთან ერთად გადავიდა საცხოვრებლად. თავდაპირველად, აჭარის მთებითა და მარადმწვანე ტყეებით გარშემორტყმული ლანდშაფტიდან ჯავახეთის ერთი შეხედვით მოტიტვლებულ, პირქუშ და მკაცრ სივრცეში იმდენად გაუჭირდა ცხოვრება, რომ ხშირად ტიროდა კიდეც და ამით იქარვებდა მშობლიური ადგილების მონატრებით გამოწვეულ დარდს, თუმცა დროთა განმავლობაში მიეჩვია ახალ გარემოს, სოფლის სკოლაში მასწავლებლად დაიწყო მუშაობა, შემდეგ დირექტორის მოადგილეც გახდა და უკვე მე-4 წელია, რაც სკოლის დირექტორის მოვალეობის შემსრულებელია.

ფოტოზე: ახალქალაქის მუნიციპალიტეტის სოფელ აზმანის საჯარო სკოლის დირექტორი ვარდო შაინიძე ცენტრში - პედკოლექტივთან ერთად

როგორც იგი GUARDIAN.GE-ისთან საუბარში ამბობს, შრომისმოყვარე ადამიანისთვის შეუძლებელი არაფერია და ქალების წამყვან პოზიციებზე ყოფნა - კლიმატურად ისეთ რთულ რეგიონშიც კი, როგორიც ახალქალაქის მუნიციპალიტეტია - მხოლოდ წაადგება საქმეს, რადგან მისი შეფასებით, ქალებს უმეტესწილად, პასუხისმგებლობის განსაკუთრებულად მაღალი გრძნობა აქვთ და დაკისრებულ მოვალეობებს პირნათლად ასრულებენ.

ვარდო შაინიძემ თბილისის ივანე ჯავახიშვილის სახელობის სახელმწიფო უნივერსიტეტის ახალციხის ფილიალის ბიოლოგიის ფაკულტეტი დაამთავრა, რამდენიმე წელი ხულოს რაიონის სოფელ ბეღლეთში იმუშავა მასწავლებლად, შემდეგ კი აზმანის სკოლაში განაგრძო პედაგოგიური საქმიანობა, დღეს კი, უკვე დირექტორობის პარალელურად, უფროსი მასწავლებლის სტატუსით ასწავლის ბიოლოგიას და წამყვანობაზეც ფიქრობს.

„ბათუმშიც მაქვს საცხოვრებელი სახლი, ჩემი ერთი შვილი იქ ცხოვრობს, შემიძლია მეც წავიდე და იქ დავიწყო სამსახური, მაგრამ თქვენ წარმოიდგინეთ, უკვე ისე მივეჩვიე ამ სოფელს, რომ აქ ვარჩევ მუშაობას. ახლა კი არა, 90-იანი წლების ისეთ რთულ პერიოდშიც კი არ მივატოვე სკოლა, როცა ხელფასები  კუპონებზე გაიცემოდა და თან თვეების განმავლობაში, 2 წელიც კი ვერ ვიღებდით ჩვენს კუთვნილ გასამრჯელოს. სწორედ ამ დროიდან და უფრო ადრიდანაც მუშაობს ბევრი ჩემი კოლეგა აზმანის სკოლაში, რომლებიც თავიანთი მაღალპროფესიონალიზმით, ერთგულად ემსახურებიან ძალზე კეთილშობილურ საქმეს, მომავალი თაობის აღზრდას“, - განუცხადა GUARDIAN.GE-ის ვარდო შაინიძემ, თუმცა წუხილი გამოხატა იმის თაობაზე, რომ ახალქალაქის ქართული სოფლებიდან მიგრაციის პროცესი სწრაფი ტემპით მიმდინარეობს და თუ ასე გაგრძელდა, არც ისე შორეულ მომავალში, აღნიშნული დასახლებული პუნქტები შესაძლოა, დაცარიელების პირამდე მივიდეს.

„1990-იან წლების დასაწყისში ჩამოვსახლდით ამ სოფელში, რაც სტიქიურ უბედურებას უკავშირდებოდა. აჭარაში განვითარებულმა მეწყერულმა პროცესებმა ეკომიგრანტებად აქცია არაერთი ოჯახი. იცით, რომ მთელი ქვეყნისთვის რთული პერიოდი იდგა გასული საუკუნის 90-იანი წლებში, და ბუნებრივია, ჩვენთვის განსაკუთრებით რთული იყო ეს დრო, რადგან, საყოველთაო გაჭირვებასთან ერთად, საცხოვრებელი პირობების კარდინალურად შეცვლა და სრულიად უცხო გარემოსთან შეგუებაც მოგვიწია. აქ როცა ჩამოვსახლდით, გარშემო ცეკავშირის შენობები იდგა, სახლები დაგვხდვა, მაგრამ იცით, რომ მალე ცეკავშირი დაიშალა და ჩვენ თავად მივამატეთ არსებულს, რადგან საცხოვრებლად არც ისე გამოსადეგი იყო ეს სახლები. პირადად მე, ძალიან უცხოდ აღვიქვი აქაურობა, აჭარის მარადმწვანე სივრციდან სამცხე-ჯავახეთის მოტიტვლებულ, პირქუშ გარემოში გადმოსვლა ძალიან რთული შესაგუებელი აღმოჩნდა ჩემთვის. 22 წლის ვიყავი, ვტიროდი, თუმცა დროის გასვლასთან ერთად, ადამიანი ეგუება ყველაფერს. ჩვენც შევეგუეთ. ბევრი რამ თვითონ გავაკეთეთ. აქაური პირობები რთულია, სამსახურის პარალელურად მიწაზე შრომაც გიწევს, შედეგი კი, ნაკლებია. სკოლის გარდა, სოფელში დასაქმების რამე სხვა ალტერნატივა არ არსებობს და ამიტომაც, სამწუხაროდ, ახალგაზრდობის უმეტესობა ტოვებს სოფელს. ეს კი შობადობის მკვეთრად შემცირებას და შესაბამისად, სკოლის მოსწავლეთა რაოდენობის კლებას იწვევს. მიგრაციის პროცესი იმდენად გაღრმავდა, რომ თუკი 90-იან წლებში აზმანის სკოლაში 70 მოსწავლე იყო, ახლა საგრძნობლად არის შემცირებული“, - განუცხადა GUARDIAN.GE-ის ვარდო შაინიძემ.

მან დირექტორის თანამდებობაზე მოსვლისთანავე სკოლის ინფრასტრუქტურის განვითარებაზე ზრუნვა დაიწყო და გარკვეულ შედეგსაც მიაღწია.

„2019 წლის დეკემბერში გავხდი დირექტორის მოვალეობის შემსრულებელი. როცა ჩემი წინამორბედი გაათავისუფლეს თანამდებობიდან, მე, როგორც მის მოადგილეს, დამეკისრა მოვალეობის შესრულება. თავდაპირველად სკოლა ბალანსზე ავიყვანეთ, შევუდექით ინფრასტრუქტურის გაუმჯობესებას. მაგრამ კვლავ დარჩენილია მოუგვარებელი საკითხები. ეზოა კაპიტალურად შემოსაღობი, იატაკია დასაგები.

„გასულ წლებში ახალქალაქის მუნიციპალიტეტის მერიას მივმართე წერილით სველი წერტილების მოწყობის თაობაზე, გულთან ახლოს მიიტანეს ჩვენი სატკივარი და დააფინანსეს ეს პროექტი. წყალი გვაქვს, თუმცა ზამთარში ზოგჯერ იყინება. ახლა მინდა მერიას ეზოს შემოღობვა ვთხოვო. წერილს ვამზადებთ და დარწმუნებული ვარ, მივიღებ მორიგ ჯერზეც მხარდაჭერას მათი მხრიდან.

„თამამად ვიტყოდი, რომ მუნიციპალიტეტის ხელმძღვანელობასთან ერთად, ყველა საჭირბოროტო საკითხის გადაწყვეტაში გვეხმარება ჩვენი რესურსცენტრის უფროსი, ქალბატონი თერეზა ჩივჩიანი. მან ნამდვილად იცის გვერდში დგომა. ყოველთვის დიდ მხარდაჭერას ვგრძნობ მისგან. აღსანიშნავია, რომ იგი ქართულ ენას უმაღლეს დონეზე ფლობს, ბათუმში აქვს დამთავრებული უნივერსიტეტი და მრავალმხრივად განვითარებული და განათლებული ახალგაზრდაა“, - უთხრა GUARDIAN.GE-ის ვარდო შაინიძემ.

დირექტორის ინფორმაციით, აზმანის საჯარო სკოლაში ამჟამად, 11 პედაგოგიდან 7 უფროსი მასწავლებელია, ოთხი კი ჯერ კიდევ უსტატუსო, ერთი ონლაინ ასწავლის მათემატიკას.

მისი თქმით, სკოლაში კარგი ატმოსფეროა შექმნილი და კოლექტივის მხრიდან სათანადო მხარდაჭერას გრძნობს.

„ძალიან კარგი ურთიერთობა მაქვს პედკოლექტივთან, ბავშვებთან, მშობლებთან, ყოფილ დირექტორთანაც ასევე, კარგი ურთიერთობა მქონდა. დიდ მხარდაჭერას ვგრძნობ ჩემი თანამშრომლებისგან. ჩემი ჯანმრთელობის მდგომარეობიდან გამომდინარე, ერთი პერიოდი თანამდებობიდან წასვლაც მქონდა გადაწყვეტილი, მაგრამ ძალიან მთხოვეს დარჩენა. სამსახური შეიძლება დიდ ენერგიას გართმევდეს, მაგრამ დიდ ძალასაც გაძლევს.

„ასევე, მინდა აღვნიშნო, რომ სკოლის ადმინისტრაციის საუკეთესო გუნდი მყავს - საქმის მწარმოებელი და ბუღალტერი. ძალიან შეწყობილად ვმუშაობ მათთან. ორივე მათგანი მეზობელი სოფლიდანაა. საქმის მწარმოებელმაც და ბუღალტერმაც კარგად იციან ქართული ენა. ბუღალტერს, სრბუჰი გალსტიანს გავლილი აქვს კურსები ჟვანიას სახელობის ადმინისტრირების სკოლაში და მიღებული აქვს ა1, ა2 და ბ1 სერტიფიკატები. ზოგადად, სახელმწიფო ენის ცოდნის მხრივ, საკმაოდ შეიცვალა მდგომარეობა რეგიონში, სამსახურში უკვე აღარ აჰყავთ ისეთი კადრები, ვინც არ იცის ქართული ენა“, - განუცხადა GUARDIAN.GE-ის ვარდო შაინიძემ.

აზმანის საჯარო სკოლის დირექტორი განათლების სფეროში მიმდინარე რეფორმების შეფასებისას ამბობს, რომ ამ მხრივ ბევრი რამ წავიდა წინ, მაგრამ არის გარკვეული პრობლემებიც.

„ეს რეფორმა საჭიროა, სხვაგვარად ვერ განვითარდები, მაგრამ არის ჩავარდნებიც, რაზეც ახლა არ მსურს საუბარი, თუმცა კიდევ ერთხელ ვიტყვი, რომ რეფორმა აუცილებელია. ადრინდელი ტრადიციული სწავლება არ იყო იმდენად ორიენტირებული ბავშვზე, როგორც სწავლის დღევანდელი მეთოდია. ახლა მოსწავლე უფროა ჩართული საგაკვეთილო პროცესში - იქნება ეს თამაშის გამოყენებით სწავლება თუ სხვა აქტივობები. მრავალმხრივი სწავლების მოდელი უფრო უვითარებს ბავშვს აზროვნებას, უფრო კრიტიკულ აზროვნებას უყალიბებს მას და, პირადად მე, ეს ძალიან მომწონს. ახლა წინარე ცოდნით აგებ მასალას, აქტიურდება წინარე ცოდნა, ეს მართლა კარგია. სასიხარულოა, როცა შედეგიც შესაბამისი გაქვს. იშვიათია ჩვენი სკოლის კურსდამთავრებულმა რომ არ დაასრულოს უმაღლესი სასწავლებელი. აუცილებელია მასწავლებელმა მოსწავლესთან მიდგომა იცოდეს, როგორ აუმაღლოს მოტივაცია, როგორ შეაყვაროს საგანი. მიხარია, რომ ბავშვებს ძალიან უყვართ ჩემი საგანი. ყოველთვის ვცდილობ ახალ-ახალი იდეებით და ინფორმაციებით შევიდე კლასში. მეც მუდმივად ძიებაში ვარ“, - განუცხადა GUARDIAN.GE-ის ვარდო შაინიძემ.

სტატია მომზადებულია GUARDIAN.GE-ის მიერ, ფოტოები კი მოწოდებულია აზმანის საჯარო სკოლის მიერ