უკრაინის შინაგან საქმეთა მინისტრმა განაცხადა, რომ მათი მცდელობა მშვიდობიანი გზით გადაწყვიტონ კიევის არეულობები, "ფუჭი" აღმოჩნდა. ვიტალი ზახარჩენკომ თქვა, რომ პროტესტანტებთან მოლაპარაკებები წარუმატებელი გამოდგა. მან განაცხდა, რომ პროტესტანტებს იარაღი აქვთ და არეულობების წარმოშობაში "რადიკალური ჯგუფები" დაადანაშაულა.

ეს კომენტარი მას შემდეგ გაკეთდა, რაც პროტესტანტებმა კიევში ენერგეტიკის სამინისტროს ნაწილი დაიკავეს. უკრაინის ოფიციოზი ამ ფაქტს აფასებს, როგორც "ტერორისტულ აქტს".

ზახაროვმა განაცხადა, რომ ოპოზიცია, რომელსაც უკვე აღარ ძალუძს გააკონტროლოს „რადიკალური ძალები,“ მოქალაქეებს საფრთხეში აყენებს.

„ჩვენი მოწოდებები არ შეისმინეს და დადებული ზავი დაარღვიეს.“ მან ასევე დაადანაშაულა პროტესტანტები ერთ-ერთი პოლიციის ოფიცერისათვის სროლასა და 3 დანარჩენის გატაცებაში.

ამასობაში კი ენერგეტიკის მინისტრმა ედუარდ სტავიცკიმ განაცხადა, რომ დაახლოებით 100 პროტესტანი ცდილობდა ენერგეტიკის სამინისტროს მთავარი შენობის აღებას კიევის ცენტრში, მაგრამ მათთან საუბრის შემდეგ მათ დატოვეს შენობა, თუმცა ჯერ კიდევ ბლოკირებული აქვთ შენობის მთავარი შესასვლელი.

„ის, რასაც ამჟამად ადგილი აქვს კიევში, პირდაპირ საფრთხეს უქმნის უკრაინის მთელ ენერგო სისტემას,“ -ამბობს როიტერსის ახალი ამბების სააგენტოსთან მინისტრი.

უკრაინის პრეზიდენტის, ვიქტორ იანუკოვიჩის აღთქმული პირობის მიუხედავად, რომ კრიზისის დასასრულებლად მზად იყო დათმობებზე წასულიყო, კიევში მთელი ღამის განმავლობაში არეულობები მაინც გაგრძელდა.

გამთენიისას კიევის ცენტრში ისევ ცეცხლი ენთო. მთელი ღამე კი პროტესტანტები პოლიციელებს ალმოდებულ ნივთებსა და სხვადასხვა საგნებს ესროდნენ. პოლიციელები კი მათ ცრემლსადენი გაზის გაშვებით პასუხობდნენ.

იანუკოვიჩმა დაჟინებით განაცხადა, რომ შეცვლიდა ანტი-საპროტესტო კანონებს და გადაახალისებდა მინისტრთა კაბინეტს, მაგრამ როგორც ვიტალი კლიჩკომ თქვა, დემონსტრანტებს ახლა თავად იანუკოვიჩის გადადგომის მოთხოვნა აქვთ.

ღამემ უკრაინაში არეულობებით ჩაირა, არიან დაკავებულებიც. უკრაინის სხვადასხვა ქალაქში აქტივისტებმა სამთავრობო დაწესებულებების დაპატრონებაც მოახერხეს.

ოთხშაბათს, 22 იანვარს, კიევში პოლიციასთან შეტაკებისას 2 ადამიანი დაიღუპა. უკვე დადასტურებულია რომ ისინი ცეცხლსასროლი იარაღით მიყენებული ჭრილობებისაგან გარდაიცვალნენ. ეს ორი დემონსტრანტი პირველი მსხვერპლი შეიქმნა კიევში გვიან ნოემბერში დაწყებული ანტი-სამთავრობო გამოსვლების შემდეგ.

ოთხშაბათს გვიან საღამოს უკრაინულმა რადიო "თავისუფლებამ" საზოგადოებას მესამე აქტივისტის სიკვდილის თაობაზეც აუწყა. რადიოს ცნობით, იური ვერბიცკის გვამი, რომელსაც წამების ნიშნები აღენიშნებოდა, კიევის გარეთ მდებარე ტყეში იპოვეს. მედიის ინფორმაციით, იგი აქტივისტ იგორ ლუცენკოსთან ერთად კვირის დასაწყისში გაიტაცეს, თავად ლუცენკო კი მოგვიანებით გაათავისუფლეს და ახლა იგი საავადმყოფოში იმყოფება.

bbc.com