GUARDIAN.GE - თურქეთის პრეზიდენტმა რეჯეფ თაიფ ერდოღანმა დაიცვა თავისი მთავრობის მიერ გადადგმული საპასუხო ნაბიჯები 6 თებერვალს ორ, რამდენიმესაათიანი შუალედით მომხდარ კატასტროფულ მიწისძვრაზე და თქვა, რომ შეუძლებელი იყო სტიქიის მასშტაბებისთვის მომზადება.
ბოლო მონაცემებით, ძლიერი მიწისძვრების შედეგად, თურქეთსა და ჩრდილოეთ სირიაში სულ მცირე 15 000 ადამიანი დაიღუპა.
კრიტიკოსები აცხადებდნენ, რომ სასწრაფო დახმარების სამსახურების რეაგირება ძალიან ნელი იყო და მთავრობა ცუდად იყო მომზადებული. ერდოღანმა აღიარა, რომ მთავრობას გარკვეული პრობლემები შეექმნა, მაგრამ თქვა, რომ მდგომარეობა ახლა „კონტროლს ექვემდებარება“.
ამას არ ეთანხმება თურქეთის მთავარი ოპოზიციური პარტიის ლიდერი ქემალ ქილიჩდაროღლუ. „თუ ამაზე პასუხისმგებელი ერთი ადამიანია, ეს არის ერდოღანი“, - განაცხადა მან.
პრეზიდენტმა უარყო ბრალდება და აღნიშნა, რომ კატასტროფის შემდეგ, საჭიროა ერთიანობა: „ასეთ პერიოდში, მე არ შემიძლია შემწყნარებელი ვიყო ადამიანებისადმი, რომლებიც აწარმოებენ ნეგატიურ კამპანიას პოლიტიკური ინტერესებისთვის“, - განუცხადა ერდოღანმა ჟურნალისტებს ჰატაიში.
ათასობით გადარჩენილი მოქალაქე, უკვე მესამე ღამეს ატარებს ყინვის პირობებში, ნანგრევების ქვეშ მყოფი ბევრი ადამიანისთვის კი იმედი ქრება.
ჯანდაცვის მსოფლიო ორგანიზაციის ოფიციალურმა წარმომადგენელმა განაცხადა, რომ მიწისძვრის შედეგად გადარჩენილებს შორის შეიძლება იყოს მნიშვნელოვანი დაზიანებები, რომელიც ყინვიანი ტემპერატურით არის გამოწვეული.
„ჩვენ, ახლა, ბევრი გადარჩენილი ადამიანი ღია ცის ქვეშ, გაუარესებულ და საშინელ პირობებში გვყავს. ჩვენ მეორადი კატასტროფის რეალური საფრთხის წინაშე ვდაგავართ, რამაც შეიძლება ზიანი მიაყენოს უფრო მეტ ადამიანს, ვიდრე თავდაპირველმა კატასტროფამ, თუ არ ვიმოქმედებთ იმავე ტემპით და ინტენსივობით, როგორც ამას ვაკეთებთ სამძებრო-სამაშველო სამუშაოების მხრივ“, - თქვა ჯანმო-ს მიწისძვრაზე რეაგირების ინციდენტების მენეჯერმა რობერტ ჰოლდენმა.
ახლომდებარე სირიაში დახმარების სამუშაოები გართულებულია წლების განმავლობაში კონფლიქტის გამო, რამაც გაანადგურა ქვეყნის ინფრასტრუქტურა.
თურქეთსა და სირიას შორის ბაბ ალ-ჰავას გადასასვლელი მიწისძვრის შემდეგ დაიკეტა, რადგან გზები ძლიერ დაზიანდა.
მაშინ, როცა გაეროს მაღალჩინოსანმა განაცხადა, რომ გზა შეიძლება მალე იყოს ხელმისაწვდომი, თურქეთის საგარეო საქმეთა მინისტრმა მევლუთ ჩავუშოღლუმ დაადასტურა, რომ ქვეყანა მუშაობს კიდევ ორი სასაზღვრო კარიბჭის გახსნაზე, რათა სირიამ დახმარება მიიღოს.
„არსებობს გარკვეული სირთულეები თურქეთისა და საერთაშორისო თანამეგობრობის დახმარების მხრივ [სირიაში შეღწევის თვალსაზრისით]. ამ მიზეზით, მიმდინარეობს მუშაობა კიდევ ორი სასაზღვრო კარიბჭის გასახსნელად“, - თქვა მან.
ევროკავშირმა დაადასტურა, რომ 3,5 მილიონი ევროს (დაახლოებით 10 მილიონი ლარი) დახმარებას გაუგზავნის სირიას მთავრობის დახმარების მოთხოვნის შემდეგ, მაგრამ დასძინა, რომ დახმარება უნდა მიეწოდოს როგორც მთავრობის, ასევე მეამბოხეების მიერ კონტროლირებად ტერიტორიებს.
მხოლოდ იდლიბის პროვინციაში 1500-ზე მეტი ადამიანი დაიღუპა. სირიის პრეზიდენტის, ბაშარ ალ-ასადის მრჩეველმა განაცხადა, რომ სანქციები ხელს უშლის სირიას საჭირო დახმარების მიღებაში. „ჩვენ არ გვაქვს საკმარისი ბულდოზერები, არ გვაქვს საკმარისი ამწეები, არ გვაქვს საკმარისი ნავთობი, ევროპული და ამერიკული სანქციების გამო“, - თქვა ბუტაინა შაბანმა.
მომზადებულია GUARDIAN.GE-ის მიერ BBC-ზე დაყრდნობით
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIANGE.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
GUARDIAN.GE - ჩრდილოეთ კორეის ლიდერი კიმ ჩენ ინი სექტემბერში რუსეთში პრეზიდენტ ვლადიმერ პუტინთან შესახვედრად გამგზავრებას აპირებს, იტყობინება BBC-ის პარტნიორი CBS-ი ამერიკელ ოფიციალურ პირზე დაყრდნობით. ორი ლიდერი განიხილავს შესაძლებლობას, რომ ჩრდილოეთ კორეამ მოსკოვს იარაღი მიაწოდოს უკრაინაში ომის მხარდასაჭერად, განაცხადა ოფიციალურმა წარმომადგენელმა. დაგეგმილი შეხვედრის ზუსტი ადგილი უცნობია. წყაროებმა „The New York Times“-ს განუცხადეს, რომ კიმი, სავარაუდოდ, ბრონირებული მატარებლით გაემგზავრება.