შეერთებული შტატების პრეზიდენტ დონალდ ტრამპსა და ავსტრალიის პრემიერ მინისტრ მალკოლმ ტერნბულს შორის სატელეფონო საუბარმა დევნილთა გასახლების შეთანხმების საკითხი კითხვის ნიშნის ქვეშ დააყენა.

The Washington Post -ის თანახმად, ტრამპმა მის ავსტრალიელ კოლეგასთან საუბარს „ჯერჯერობით ყველაზე უარესი“ უწოდა მათ შორის, რაც კი მას მსოფლიო ლიდერებთან მანამდე ჰქონია და საუბარი დაგეგმილზე ადრე გაწყვიტა.

მოგვიანებით ტრამპმა „თვითერზე“ დაწერა, რომ იგი „შეისწავლის ამ სულელურ შეთანხმებას“.

ობამას ადმინისტრაციის მიერ მიღებული გადაწყვეტილება შეერთებულ შტატებს ავალდებულებს მიიღოს თავშესაფრის 1 250-მდე მაძიებელი, რომელთა ავსტრალიაში შეშვებაზე ქვეყნის მთავრობამ უარი განაცხადა და დევნილებს დღემდე ოფშორულ დაკავების ცენტრებში ამყოფებენ ნაურუსა და პაპუა ახალ გვინეაში.

პრემიერ მინისტრი ტერნბული დევნილების თაობაზე შეთანხმების მომავლის გარკვევას ცდილობდა მას შემდეგ, რაც გასულ პარასკევს ტრამპმა ბრძანებას მოაწერა ხელი, რომლის თანახმადაც დევნილებს და 7 მუსულმანური ქვეყნის მოქალაქეებს, მათ შორის აღნიშნული 7 ქვეყნიდან ვიზების და მწვანე ბარათების მფლობელებს და ასევე ორმაგ მოქალაქეებს შეერთებულ შტატებში შესვლა ეკრძალებათ.

ტრამპსა და ტერნბულს შორის სატელეფონო საუბარი შაბათს შედგა და ერთ-ერთი იყო იმ ოთხთაგან, რომელიც შეერთებული შტატების პრეზიდენტს მსოფლიო ლიდერებთან, მათ შორის რუსეთის პრეზიდენტ ვლადიმერ პუტინთან ჰქონდა.

The Washington Post-ი შეერთებული შტატების იმ ოფიციალურ პირებზე დაყრდნობით, რომლებიც სატელეფონო საუბრის შესახებ ინფორმაციას ფლობენ, წერს, რომ საუბარი 1 საათი უნდა გაგრძელებულიყო, მაგრამ ის ტრამპის მიერ მოულოდნელად დასრულდა 25 წუთის შემდეგ.

გავრცელებული ცნობით, შეერთებული შტატების პრეზიდენტმა განაცხადა, რომ დევნილების მიღება „ბოსტონის შემდეგი დამბომბველების“ - რომლებიც რუსეთის კავკასიის რეგიონიდან იყვნენ - მიღების ტოლფასი იქნებოდა.