ისრაელის სამხედრო ძალებმა ორშაბათს, შეხლა-შემოხლისას ჩრდილოეთ ღაზას სექტორის ტერიტორიიდან „ჰამასის“ 13 შეიარაღებული პირის ისრაელის ტერიტორიაზე შეჭრის მცდელობა აღკვეთა, განაცხადა ისრაელის არმიამ ცოტა ხნის წინ.

სამხედროების თქმით, ცამეტივე ეჭვმიტანილი ტერორისტი ისრაელის თავდაცვის ძალების ჯარისკაცებთან შეიარაღებული ბრძოლისას იქნა მოკლული.

ორშაბათს, ღაზას სექტორში საზღვრის გასწვრივ დაახლოებით 40 000 პალესტინელი იყო შეკრებილი და იერუსალიმში ამერიკის შეერთებული შტატების საელჩოს გახსნას აპროტესტებდა. პალესტინის ჯანდაცვის სამინისტროს ბოლო მონაცემებით, გარდაცვლილია 60 ადამიანი, ხოლო სხვადასხვა სახის დაზიანებები აქვს მიღებული 2 771 მოქალაქეს. 

ისრაელის თავდაცვის სამინისტროს ცნობით, მისი ძალების მიერ მოკლული 60 პალესტინელიდან, 24 სხვადასხვა ტერორისტული დაჯგუფების წევრი იყო. 

ჰამასის განცხადებით კი, მოკლულთაგან 10 მისი შინაგან საქმეთა სამინისტროს თანამშრომელი იყო, რომლებიც ღაზაში უსაფრთხოების სააგენტოებზე აგებდნენ პასუხს. 

როიტერსის“ ცნობით, შეიარაღებული დაპირისპირება საზღვრის გადალახვის მცდელობისას დემონსტრანტებთან მაშინ მოხდა, როცა იერუსალიმში შეერთებული შტატების საელჩოს ოფიციალური გახსნის ცერემონიისათვის ემზადებოდნენ.

პალესტინელები აღშფოთებული არიან იმით, რომ ისრაელი იერუსალიმს თავის დედაქალაქად მიიჩნევს, მაშინ როცა პალესტინური მხარე წმინდა ქალაქის აღმოსავლეთ ნაწილზე თავად აცხადებს პრეტენზიას და აპროტესტებს პრეზიდენტ ტრამპის გადაწყვეტილებას აშშ-ის საელჩოს თელ-ავივიდან იერუსალიმში გადატანასთან დაკავშირებით.

ისრაელის ძალების განცხადებით, ღაზას გასწვრივ შეკრებილი დემონსტრანტები საზღვრის განგრევას ცდილობდნენ და მათ საპასუხო ზომები მიიღეს.

პრეზიდენტი დონალდ ტრამპი, რომელმაც რამდენიმე თვის წინათ იერუსალიმი ისრაელის დედაქალაქად აღიარა, ამ წმინდა ქალაქში აშშ-ის საელჩოს გახსნის ცერემონიაზე დასასწრებად თავად არ ჩასულა, მაგრამ მისი ვიდეომიმართვა იქ დიდ ეკრანზე იქნა ნაჩვენები.

აშშ-ის საელჩოს გახსნის ოფიციალურ ცერემონიაზე ტრამპმა იერუსალიმში მისი ქალიშვილი ივანკა ტრამპი და სიძე ჯერად კუშნერი გააგზავნა.

როგორია საერთაშორისო რეაქცია?

ღაზას სექტორში გუშინდელ ხოცვა-ჟლეტას ზოგიერთი ქვეყნის მძაფრი რეაქცია მოჰყვა, მაგრამ შეერთებულმა შტატებმა, ისრაელის უმთავრესმა პოლიტიკურმა მოკავშირემ მხარი დაუჭირა ნეთანიაჰუს მთავრობის მიერ გადადგმულ ნაბიჯს.

თეთრი სახლის წარმომადგენელმა განაცხადა, რომ „აღნიშნულ ტრაგიკულ დღეზე, რასაც უამრავი ადამიანის სიცოცხლე შეეწირა, პასუხისმგებლობა მთლიანად ჰამასს ეკისრება... ჰამასმა განზრახ და ცინიკურად გამოიწვია ეს პასუხი“.

ქუვეითმა „აღშფოთება და წუხილი“ გამოხატა და გაერო-ს უშიშროების საბჭოს განცხადებით მიმართა ძალადობის დამოუკიდებელი გამოძიების მოთხოვნით, მაგრამ მისი წინადადება შეერთებულმა შტატებმა დაბლოკა.

დიდმა ბრიტანეთმა განაცხადა, რომ „მსხვერპლის დიდი რაოდენობა უკიდურესად შემაშფოთებელია“, მაგრამ დაამატა, რომ პროტესტი მშვიდობიანი უნდა ყოფილიყო.

გერმანიამ განაცხადა, რომ ისრაელს ჰქონდა თავისი თავის თავდაცვის უფლება, მაგრამ ეს პროპორციულად უნდა გაეკეთებინა.

საფრანგეთის პრეზიდენტმა ისრაელის სამხედროების მიერ განხორციელებული ძალადობა დაგმო.

თურქეთმა განაცხადა, რომ შეერთებულმა შტატებმა ისრაელთან ერთად გაიზიარა „უღმერთო ხოცვა-ჟლეტაზე“ პასუხისმგებლობა და ანკარამ ორივე ქვეყნიდან თავისი ელჩები გამოიძახა.

თავისი ელჩი გამოიწვია ისრაელიდან ასევე სამხრეთ აფრიკამ, რომელმაც „ისრაელის ბოლო თავდასხმა“ დაგმო.

ერთ-ერთი ყველაზე მძაფრი რეაქცია ჰქონდა გაერო-ს ადამიანის უფლებების დეპარტამენტის ხელმძღვანელს, ზეიდ რაად ალ-ჰუსეინს, რომელმაც დაგმო „ისრაელის მიერ გახსნილი ცეცხლის შედეგად ათეულობით ადამიანის შოკისმომგვრელი მკვლელობა და ასეულობით ადამიანის დაჭრა“.