ზაზა სარალიძე 10 ივნისს ელოდება, რა დროისთვისაც ხორავას ქუჩაზე მოკლული მისი შვილის საქმესთან დაკავშირებით უკვე შინაგან საქმეთა სამინისტროს დაქვემდებარებაში გადასულმა გამოძიებამ კონკრეტული შედეგები უნდა დადოს და მისი თქმით, ამ საქმესთან დანაშაულებრივ შემხებლობაში მყოფი გარკვეული პირები, მათ შორის მირზა სუბელიანი და ირაკლი შოთაძე დააკავოს.

„თქვენ დარწმუნებული ხართ, რომ 9 საათი სჭირდებოდა ამ კაცის [მირზა სუბელიანის] დაკითხვას? მე არა მგონია რომ დასაკითხად ყოფილიყო იქ. ალბათ მოლაპარაკება მიდიოდა იმასთან დაკავშირებით, დაეკავებინათ თუ არა“, განაცხადა ზაზა სარალიძემ პარლამენტში საგამოძიებო კომისის წევრებთან გამართული შეხვედრის შემდეგ, რა დროსაც მან კომისიიდან ეკა ბესელიას აცილება მოითხოვა, და აღნიშნა, რომ ზოგადად, პირველი დაკითხვაა გრძელვადიანი, ხოლო შემდგომი დაკითხვებისას მხოლოდ ინფორმაციების დაზუსტებები ხდება და ის მოკლევადიანი, 1-2-საათიანი პროცედურებია.

„10 რიცხვამდე ვადა მივეცი, კონკრეტული პირები ჩამოვუთვალე, რომელთა დაკავების აბსოლუტური საფუძველი გააჩნიათ, თუ არ დააკავებენ, ჩვეულებრივად გაგრძელდება აქციები იმის მოთხოვნით, რომ სამართლიანობა აღდგეს აუცილებლად“.

მან დასაკავებელ პირთა შორის ყოფილი მთავარი პროკურორი ირაკლი შოთაძე დაასახელა და თქვა, რომ იგი „იმ დღესვე იყო დასაკავებელი, მაგრამ ფაქტია, რომ არ დაუკავებიათ“.

სარალიძემ ჟურნალისტებთან საუბრისას ასევე განაცხადა, რომ პარლამენტის ახლადშექმნილ საგამოძიებო კომისიას ენდობა იმ ნაწილში, რომ „აუცილებლად გამოააშკარავებენ იმ პირებს, ვინც გააყალბა და შეთითხნა ეს საქმე“.