პარლამენტის თავმჯდომარის, ირაკლი კობახიძის მიერ მმართველი პარტიის პოზიციის გახმოვანების შემდეგ, რომ „ქართული ოცნება“ საპრეზიდენტო კანდიდატს არ წარადგენს და შესაძლოა მხარი რომელიმე დამოუკიდებელ კანდიდატს დაუჭირონ, პარტიის პოლიტიკური საბჭოს წევრმა, სოზარ სუბარმა განაცხადა, რომ ჯერჯერობით არ გადაუწყვეტიათ, თუ რომელ დამოუკიდებელ კანდიდატს დაუჭერს მხარს „ქართული ოცნება“ და ამას პოლიტსაბჭო მოგვიანებით გადაწყვეტს.

მანვე დაამატა, რომ რადგან „ნაციონალურ მოძრაობასა“ და მის „განაყოფ“ პარტიებს მხარდამჭერები ისევ ყავთ, ნამდვილად არ სურს მათი ხილვა, თუნდაც „სიმბოლურ, მაგრამ ძალიან საპატიო თანამდებობაზე“.

„თითქმის ორსაათიანი მსჯელობა იყო და გუნდში არ არსებობდა განსხვავებული აზრი იმასთან დაკავშირებით, რომ საპრეზიდენტო არჩევნებში კანდიდატის გარეშე გასვლა კარგი პოზიციაა. თუმცა, განსხვავებული აზრი იყო იმაზე, რომ შემდეგში ვიმსჯელოთ, დავუჭიროთ თუ არა მხარი რომელიმე კანდიდატს. რამდენიმე დეპუტატმა განაცხადა, რომ არ იქნება სწორი, რომ საერთოდ არავის არ დავუჭიროთ მხარი. საბოლოოდ, ეს საკითხიც განვიხილეთ და გადავწყვიტეთ, რომ როდესაც ყველა კანდიდატი იქნება დასახელებული, პოლიტსაბჭო გადაწყვეტს, რა პოზიციით გამოვალთ, დავუჭერთ მხარს ვინმეს, და თუ დავუჭერთ, ვინ იქნება ეს ან, არ დავუჭერთ მხარს არავის. მიმაჩნია, რომ ეს პოზიცია სწორია. დამოუკიდებელი კანდიდატი, ბუნებრივია, 41 ნომრით ვერ წარსდგება. რადგანაც ჩვენს ქვეყანაში, სამწუხაროდ, ნაციონალურ მოძრაობასა და მის განაყოფ პარტიებს მხარდამჭერები ისევ ყავთ, ნამდვილად არ მინდა ისინი ვიხილო, თუნდაც სიმბოლურ, მაგრამ ძალიან საპატიო თანამდებობაზე“, განაცხადა სოზარ სუბარმა.