პრეზიდენტობის დამოუკიდებელი კანდიდატი სალომე ზურაბიშვილი ხელმოწერების შეგროვებას ბოლნისსა და დმანისსში განაგრძობს და ბიზნესმენებს მოუწოდებს მისი წინასაარჩევნო კამპანია დაუფინანსონ, რადგან როგორც ზურაბიშვილი იძახის, ის ყველას პრეზიდენტი იქნება. დამოუკიდებელი კანდიდატი დღეს „ფეისბუქზე“ გამოაქვეყნებს ანგარიშს, სადაც მსურველებს შეეძლებათ ჩაურიცხონ მას თანხა და დაეხმარონ კამპანიის წარმართვაში.

„ძალიან მადლობელი ვიქნები გოგა ხაინდრავას და ლევან გაჩეჩილაძის თუ იქნებიან ჩემი დამფინანსებლები სხვებთან ერთად, იმიტომ რომ ეს არ იქნება საკმარისი. ჩემი ფონდი დაარსდა გუშინ. სწორედ დღეს უნდა გამოვაქვეყნო „ფეისბუქზე“ მისი ანგარიშები, პირველი დამფინანსებელი, მინდა გითხრათ, მე ვარ ჩემი პირადი დანაზოგიდან. მინდა მივმართო ჩემი მეგობარი ბიზნესმენები ვინც არიან, ან არა მეგობრები, ვინც ახლოდან არ მიცნობს, ყველას მინდა მივმართო, რომ მე უნდა მივიღო მათგან მხარდაჭერა, იმიტომ რომ უნდა ვიყო ყველას პრეზიდენტი“, განაცხადა სალომე ზურაბიშვილმა.

„ქართულ ოცნებაში“ ჯერაც არ აქვთ მიღებული გადაწყვეტილება, დამოუკიდებელ კანდიდატს დაუჭერენ მხარს თუ თავიანთი კანდიდატი ეყოლებათ. როგორც პრემიერმა განაცხადა, გუნდში ჯერ კიდევ იმაზე მიმდინარეობს დისკუსია, ეყოლებათ თუ არა მათ საკუთარი კანდიდატი, მაგრამ სალომე ზურაბიშვილს იმედი აქვს, რომ „ქართული ოცნება“ მას მხარს დაუჭერს.