მმართველმა გუნდმა გადაწყვეტილება შეცვალა და უზენაესი სასამართლოს თავმჯდომარეობის კანდიდატის შესარჩევად გიორგი მარგველაშვილს აღარ შეხვდება. „ქართული ოცნების“ წევრები მიიჩნევენ, რომ პრეზიდენტი თავისი აპარატის თანამშრომელს წარადგენს უზენაესი სასამართლოს თავმჯდომარეობის კანდიდატად.

პარლამენტის პირველი ვიცე-სპიკერი თამარ ჩუგოშვილი აცხადებს, რომ პრეზიდენტის მიერ უზენაესი სასამართლოს თავმჯდომარეობის კანდიდატის შერჩევის პროცესში მმართველი გუნდის ჩართვას აზრი არ აქვს. ჩუგოშვილი არ აკონკრეტებს დაუჭერს თუ არა მხარს მარგველაშვილის მიერ წარდგენილ კანდიდატს საპარლამენტო უმრავლესობა.

„პრეზიდენტის ადმინისტრაციამ კინკლაობა უწოდა ჩვენთან საუბარს, არადა უმრავლესობა არის ის ჯგუფი, ვინც უნდა მიიღოს გადაწყვეტილება უზენაესის თავმჯდომარის დანიშვნასთან დაკავშირებით. ასეთი დამოკიდებულებით აზრი არ ექნება, ფორმალობა იქნება ჩვენი საუბარი და რეალურად რეალური კონსულტაციები, რომლის ფარგლებშიც უნდა ჩამოყალიბდეს ორი მთავარი სუბიექტი - პრეზიდენტი და პარლამენტის უმრავლესობა კანდიდატთან დაკავშირებით, ვერ მოხერხდება, როგორც ჩანს. პრეზიდენტს შეუძლია, თავად გააგრძელოს პროცესი, წარმოადგინოს კანდიდატურა და კანდიდატურიდან გამომდინარე, მივიღებთ გადაწყვეტილებას, დავუჭერთ თუ არა მხარს. თითქმის, ყველა მნიშვნელოვან პოზიციაზე კანდიდატები, რომლებიც იყვნენ პრეზიდენტის მხრიდან წარმოდგენილები, იყვნენ მისი ადმინისტრაციის თანამშრომლები, ეს გარკვეულ სკეპტიციზმს გვიჩენს. ჩვენ არ გვინდა აპრიორი წინააღმდეგობა გამოვუცხადოთ ამ პროცესს, უბრალოდ ჩვენი ჩართვის შედეგს ვერ ვხედავთ“, განაცხადა თამარ ჩუგოშვილმა.