თურქეთის პრეზიდენტის ოფისის განცხადებით, რეჯეფ თაიფ ერდოღანი ივლისში ყატარს და საუდის არაბეთს ესტუმრება მას შემდეგ რაც საუდის არაბეთმა, ეგვიპტემ, არაბეთის გაერთიანებულმა საამიროებმა და ბაჰრეინმა დოჰასთან დიპლომატიური ურთიერთობები გაწყვიტეს და მას ულტიმატუმები წაუყენეს.

სააგენტო „ფრანს პრესის“ ცნობით, ერდოღანი 23-24 ივლისის ტურის ფარგლებში ასევე ეწვევა ქუვეითსაც - ყატარის კრიზისის მთავარ შუამავალ ქვეყანას.

თურქეთი მთავარი მოკავშირეა ყატარის, რომელიც ყურის მისმა მეზობლებმა ტერორიზმის მხარდაჭერის ბრალდებით, რასაც დოჰა კატეგორიულად უარყოფს, დიპლომატიურ და ეკონომიკურ იზოლაციაში მოაქციეს.

კრიზისმა თურქეთი დელიკატურ პოზიციაში მოაქცია, რადგან ყატარი ყურეში მისი ძლიერი მოკავშირეა და ანკარა ფრთხილობს მეტისმეტად არ გააღიზიანოს და მტრად არ გაიხადოს მთავარი რეგიონული მოთამაშე საუდის არაბეთი, თუმცა მიუხედავად ამისა, თურქეთის პრეზიდენტმა ყატარის მისი მეზობელი სახელმწიფოებისაგან იზოლირება ისლამური ღირებულებების დარღვევად და „სიკვდილით დასჯის“ მსგავს ქმედებად გამოაცხადა, რაც ყველაზე ძლიერი პოლიტიკური ჩარევა იყო კრიზისში მას შემდეგ, რაც ანკარას მძლავრ მოკავშირესთან, ყატართან, ოთხმა არაბულმა სახელმწიფომ - საუდის არაბეთმა, ეგვიპტემ, ბაჰრეინმა და არაბეთის გაერთიანებულმა საამიროებმა დოჰას მიერ ტერორისტების და „მუსულმანთა საძმოს“ და შიიტური ირანის მხარდაჭერის ბრალდებით დიპლომატიური ურთიერთობების გაწყვეტის შესახებ გამოაცხადეს და მასზე მკაცრი ეკონომიკური სანქციები დააწესეს.

ოთხმა არაბულმა სახელმწიფომ მოგვიანებით დოჰას მიმართ ულტიმატუმი გამოსცა და მისგან „ალ ჯაზირას“ ტელევიზიის დახურვა, ირანთან კავშირების შეზღუდვა, თურქული ბაზის დახურვა და კომპენსაციის გადახდაა მოთხოვნილი, რასაც ყატარი არ დათანხმდა.

ყატარი უარყოფს, რომ ის მხარს უჭერს ისლამისტ მებრძოლებს და შიიტურ ირანს, ყურის სუნიტური არაბული მონარქიების ძველ რეგიონულ მტერს.

„ძალიან დიდი შეცდომა იქნა დაშვებული ყატართან დაკავშირებით; სახელმწიფოს იზოლირება ყველა მიმართულებით, არაჰუმანური და ისლამური ღირებულებების საწინააღმეგოა. ეს ყატარისთვის სიკვდილით დასჯის გამოცხადების მსგავსი რამაა“, უთხრა ერდოღანმა მმართველი პარტიის წარმომადგენლებს ანკარაში და დაამატა:

„ყატარმა, თურქეთთან ერთად ყველაზე გადამწყვეტი პოზიცია აჩვენა ტერორისტული ორგანიზაციის, „ისლამური სახელმწიფოს“ წინააღმდეგ. ჩირქის მოცხების კამპანიით ყატარის მსხვერპლად შეწირვა არავითარ მიზანს არ ემსახურება“.

მიუხედავად იმისა, რომ ყატარი - ისევე როგორც მისი იზოლაციაში მომქცევი ქვეყნები, განსაკუთრებით კი საუდის არაბეთი - ამერიკის შეერთებული შტატების სტრატეგიული მოკავშირეა და ყატარში, ალ უდეიდის საჰაერო ბაზაზე აშშ-ის და კოალიციის 11 000-ზე მეტი სამხედროა განლაგებული, რომლებიც „ისლამურ სახელმწიფოს“ ებრძვიან, პრეზიდენტი ტრამპი დაუყოვნებლივ მიესალმა 4 სახელმწიფოს მიერ ყატართან დიპლომატიური ურთიერთობების გაწყვეტას, თუმცა მოგვიანებით სახელმწიფო მდივანი რექს ტილერსონი დოჰასადმი სანქციების შერბილების ინიციატივით გამოვიდა.

ნავთობით მდიდარი ყატარი, რომელიც დიპლომატიურ სკანდალამდე თავისი სამეზობლოს დიდი არაბული სახელმწიფოებიდან ახდენდა კვების პრდუქტების 80%-ის შემოტანას, საკვებით უზრუნველყოფის საკითხზე მოლაპარაკებებს ირანთან და თურქეთთან აწარმოებს.